Hatutan.com, (06 Fevereiru 2024), Díli- Bankada FRETILIN iha Parlamentu Nasionál, Tersa (06/02/2024), hatama keixa bá Ministériu Públiku (MP) hasoru Ministra Saúde, Élia A.A dos Reis Amaral, relasiona ho problema stoke out ai-moruk ne’ebé prejudika povu nia vida , inklui prejudika atendimentu públiku iha ospitál ho postu saúde sira iha territóriu nasionál.

Lee Mós: Kompañia Sali-Magu Garante Fó Servisu Kualidade iha Fornesimentu Ai-Moruk

Xefe Bankada FRETILIN, Aniceto Longuinhos Guterres, hamutuk ho nia membru Bankada nain-rua halo keixa bá MP hasoru Ministra Saúde, Élia A.A dos Reis Amaral, Tersa (06/02/2024). Foto/Tome da Silva

Xefe Bankada FRETILIN, Aniceto Longuinhos Guterres, hateten iha keixa ne’e Bankada FRETILIN konsidera Ministra Saúde Élia A.A  dos Reis Amaral nu’udár autpra prinsipál iha partisipasaun krime negosíu ekonómiku iha prosesu adjudikasaun direta bá empreza Sali-Magu iha prosesu sosa ai-moruk ho nia valor kontratu besik US$6,000,000.00.  

“Ami deputadu bankada FRETILIN;  Deputada Nurima Ribeiro no Deputada Helena Martins ho ha’u rasik, mai hato’o keixa ida nu’udár partisipasaun hasoru Ministra Saúde Élia A.A  dos Reis Amaral, tanba akontese falta ai-moruk i depois afeta mós bá pasiénte sira balu lahetan atendementu di’ak no barak mós mate iha periódu ida momentu ai-moruk laiha. Ai-moruk falta la’ós tanba osan laiha osan iha Governu halo aprovisionamentu maibé kompaña ida ne’ebé hetan ajusta direta maka kompañia laiha esperiénsia totalmente laiha esperiénsia kona-bá fornesimentu ai-moruk bá ospitál,” Xefe Bankada FRETILIN, Aniceto Guterres haktuir bá jornalista sira hafoin submete keixa bá MP  iha edifísiu Prokuradoria Jerál Repúblika (PGR, sigla portugés) iha Colmera, Díli.

Advertisement

Xefe bankada FRETILIN ne’e mós konsidera aktu ida-ne’e hanesan favoritizmu konstitui partisipasaun krime bá ekonómika i negosiu. Aliende ida-ne’e, tuir Aniceto Guterres, iha mós lapsu administrativu iha prosesu aprovisionamentu hodi halo  ai-moruk to’o atraja tanba kompañia Sali-Magu laiha esperiénsia halo situasaun ida-ne’e prolonga kle’ur no  parese to’o agora afeita ema pasiénte barak la hetan tratamentu ho loloos.

Xefe Bankada FRETILIN, Aniceto Longuinhos Guterres, hamutuk ho nia membru Bankada nain-rua halo keixa bá MP hasoru Ministra Saúde, Élia A.A de Jesus Amaral, Tersa (06/02/2024). Foto/Tome da Silva

Iha momentu ida hosi periódu, 26 fulan-Dezembru 2023 mai to’o segunda semana, fulan-Janeiru 2024, ema mate lubuk ida numeru rejistu iha ospitais iha Díli de’it por volta na’in-20 resin.

“Ha’u hanoin ida-ne’e mós bele konstitui krime ida tanba por neglijensia tanba sira hatene katak kompañia Sali-Magu laiha esperiénsia ne’e fó riskú tebes prosesu aprovisionamentu no akizasaun ai-moruk ne’e bele atraja,” Aniceto Guterres hateten.

Bankada oposizaun ne’e husu IX Governu liuhosi Ministra Saúde Élia A.A dos Reis Amaral ne’ebé sai autór prinsipál bá keixá ida-ne’e atu toma responsabilidade  kriminál mós bá krime ne’ebé maka bele konstitui.

Deputadu Aniceto Guterres mós haktuir nu’udár deputadu hanesan mós sidadaun ida iha diretu atu hato’o keixa ne’ebé komete aktu krime iha laran.

Jornalista Estajiária: Zita Menezes

Advertisement