Hatutan.com, (06 Fevereiru 2024), Díli—Ministru Obras Publika (MOP), Samuél Marçal hateten Diretór Koléjiu São Miguel Arcanjo (CSMA, sigla portugés), Armindo Krisna Caeteno, iha direitu tomak atu lori Governu bá Ministériu Públiku ka Tribunál.
Lee Mós: Sobu Edifísiu CSMA Obrigatóriu, Armindo Ameasa Lori IX Governu bá Ministériu Públiku
Sekretáriu Estadu bá Toponímia no Organizasaun Urbana (SEATOU), Germano Santa Brites Dias, organiza mákina pazadu sobu obrigatóriu edifísiu CSMA nian, Segunda 05 Fevereiru 2024. Foto/Elio dos Santos da Costa.
Fundadór eskola Koléjiu São Miguel Arcanjo (CSMA-Sigla Português) Armindo Crisna Caetano ameasa lori IX Governu Konstitusionál liu liu Sekretáriu Estadu bá Toponímia no Organizasaun Urbana (SEATOU), Germano Santa Brites Dias, bá Ministériu Públika (MP) tanba konsidera sobu obrigatóriu edifísiu CSMA nian hanesan sobu fahi-luhan.
Iha Segunda 05 fulan-Fevereiru 2024, maizumenus tuku 14:30 lorokraik, Sekretáriu bá Toponímia no Organizasaun Urbana, Germano Dias hamutuk ho diretór sira iha Ministériu Administrasaun Estatál (MAE), hamutuk tán ho ekipa jestaun merkadu munisipiu Díli, ho funsionáriu sira Ministériu Obras Públikas nian, ho mákina (eskavadór) tun bá sobu rahun edifísiu eskola CSMA nian iha Comoro-Díli.
Ministru Samuél Marçal hateten problema ne’e la’ós foin horseik ka horbairua, maibe problema ne’e hahú kedas iha tinan 2018 antes nia simu kargu nu’udár Ministuo Obrás Públika.
“Kona-bá ida-ne’e ha’u laiha problema, ne’e konforme diretór eskola, nia lori ne ‘e nia direitu, karik iha problema ruma, justisa bolu ita bá hatan,” Ministru Samuél Marçal hateten hodi responde Hatutan.com iha Palasiu Governu, Díli, Tersa (06/02/2024).
Samuél Marçal hateten hanesan durante ne’e alargamentu estrada Tasi-Tolu mai rotunda Prezidente Nicolau Lobato paradu ka sidauk iha kontinuasaun tanba deit laiha konkordansia entre Governu ho diretór eskola CSMA. Maibé, foin daudauk ne’e h MOP la konsege halo negosiasaun to’o remata, no agradese bá Sekretariu Estadu Assuntu Toponimia no Organizasaun Urbana mak halo negosiasaun konsege iha akordu ida, konkorda malu hodi bele sobu, la’ós sobu hotu, maibe parte oin ne deit.
Razaun Governu deside sobu obrigatoriu tanba iha tempo badak sei iha serimonia ida iha Tasi-Tolu kona-bá vizita Papa Francisco nian mai Timor-Leste, ho nune’e labele hein tempu no tenke duni tempu atu bele konklui projetu estrada ne’e iha fulan-lima nia laran ne’e.
“Bazeia bá esperiensia negosiasaun ne’e dada bá mai hela deit, nunka iha solusaun, dala-ruma diretór konkorda tiha, pois atu selu lakohi fila fali, entaun entrega bá SETOU, ha’u haree mak estrada, ha’u apresia ho SETOU tanba hetan duni akordu ho direór CSMA ho nia advogado horseik bele sobu,” Ministru Samuél Marçal afirma.
Nia informa tan katak simu ona informasaun hateten diretór CSMA ne’ebe hanesan mós fundadór entrega ona konta bankaria ba, tamba preparasaun atu selu ne’e kleur ona, maibe atraza tanba deit diretór mak sidauk kompleta dokumentu balun bainhira husu.
Liga bá fatin foun ne’ebe Governu deside bá CSMA, Samuél Marçal hateten, ne’e la’ós nia kompetensia, maibe ne’e kompetensia Sekretariu Estadu Terras no Propriedades ho Sekretariu Estadu Assuntu Toponimia no Organizasaun Urbana.
Jornalista: Leopoldina de Carvalho