Hatutan.com, (07 Fevereiru 2024), Díli—Forum ONG Timor-Leste  (FONGTIL) nota katak projetu 15 ho karater adjudikasaun iha Eletrisidade Timor-Leste Empreza Públiku (EDTL,E.P) la nakloke no laiha transparénsia tuir prínsipe boa-governasaun.  

Lee Mós: CAC Halibur Informasaun Liga ho Projetu Adjudikasaun Direta iha EDTL,E.P

Diretór Ezekutivu FONGTIL, Valentim da Costa. Foto/Lazaro Pereira Quefi

Diretór Ezekutivu  FONGTIL, Valentim da Costa esplika katak instituisaun Estadu hotu-hotu, direta no indireta, iha autoridade tuir lei ne’ebé mak iha hodi halo servisu bá aprovizionamentu nian, maibé hanesan sosiedade sivíl iha hanoin ida katak presiza halo prosesu ida ne’ebé mak nakloke no hatudu kontabilidade di’ak, liuliu bá projetu sira ne’ebé mak sei oferese mai hosi ministériu hotu.

Tuir nia haree katak projetu 15 ne’ebé mak instituisaun EDTL, E.P halo ho intensaun adjudikasaun direta  uza hanesan hatudu de’it ne’e  ladún furak tanba Estadu Timor Leste mós kria Komisaun Nasionál Aprovizionamentu (CAN, sigla portugés) atu bele fasilita buat sira ne’e ho di’ak liu no transparente.

“Adjudikasaun direita ne’e afeta mós bá ita-nia setor privadu sira iha Timor-Leste, barak mak bele la hetan oportunidade. Envés tenke loke konkursu públiku (Tenderizasaun) hodi ema hotu-hotu bele kompete hodi hetan oportunidade hodi fasilita esperiénsia  setor privadu iha Timor Leste. Se buat ki’ik, boot, ita hatudu de’it ne’e oinsá mak ita bele hakbiit setor privadu sira iha Timor Leste,” Diretór Ezekutivu FONGTIL, Valentim da Costa hateten bá Hatutan.com iha  edifísiu FONGTIL, Caicoli, Díli, (07/02/2024).

Nia  hatutan, se halo babeik adjudikasaun direita ka hatudu de’it ne’e setor privadu seluk ne’ebé mak iha hanoin atu kompete bá ida ne’e sei la iha oportunidade tanba hatudu malu ka bolu malu de’it.

“Ami hanoin katak nafatin uza tenderizasaun hanesan baibain, nakloke ho responsabilidade hodi permite setor privadu sira ne’ebé mak iha duni koñesimentu di’ak bá tipu projetu sira ne’e. Ha’u hanoin sira kompete ne’e di’ak liu tuir prosesu ne’ebé mak iha” Valentim da Costa hateten.

Nia dehan se akontese babeik adjudikasaun direita hanesan mak sei fó impaktu ne’ebé mak la di’ak bá prosesu kontabilidade nian no mós prosesu promove transparénsia ninian, tan ida ne’e mak Governu tenke tau bá notas tanba la iha prosesu ida ne’ebé mak nakloke tanba diretamente de’it nune’e bá futuru sei iha implikasaun no problema kona-bá nepotizmu ho korrupsaun sistematizadu sei la’o makas  ka buras iha rai-laran.

Nia haforsa tan katak bá projetu ida ne’ebé mak  ho karater urjenti loos ezemplu hanesan estada ka ponte  kotu mak adjudika hodi bele kampaña halo intervensaun lalais ne’e bele halo bá setor privadu sira ne’ebé iha kbit finanseiru, ekipamentu no prestasaun servisu kualidade  bele halo ka atende hela, maibé bá sira ne’ebé lista sai hanesan projetu bá fulan 4,5 bá leten ne’e di’ak liu loke liu hosi CNA hodi ema hotu-hotu bele kompete.

Adjudikasaun direita ne’e la dun di’ak nune’e FONGTIL sujere atu iha futuru tenke hadi’a no husu ba Governu liuliu ba Ministériu idak-idak presiza loke tenderizasaun uza nafatin atu CNA ne’e uza nia kna’ar sai hanesan fatin ne’ebé mak loke tenderizasaun hodi bele fahe oportunidade ema sese de’it.

Tuir FONGTIL nia haree katak buat ida adjudikasaun direita ne’e iha tempu naruk bele mosu korrupsaun tanba hatudu malu de’it, la iha prosesu ida ho transparente no la liu hosi prosesu aprovizionamentu no dala balun la pratika sira ne’e la refleta bá sentidu boa-governasaun.

Molok ne’e, iha loron 06 fulan-Fevereiru 2024, Komisáriu Ezekutivu Korporativu (KEK) Eletrisidade Timor-Leste Empreza Públika (EDTL,E.P), Júlio de Jesus Gonçalves, dezmente no deklara laiha adjudikasaun direta no prátika korrupsaun ho nepotizmu iha projetu 15 ne’ebé EDTL, E.P iha tanba prosesu hotu-hotu tuir prosedimentu normál no regra aprovizionamentu.

Júlio de Jesus Gonçalves deklara ida-ne’e atu responde de’it kona-bá notísia ne’ebé fó-sai iha Hatutan.com, Segunda (05/02/2024), ho títulu “Projetu 15 iha EDTL,E.P halo ho adjudikasaun direta deskonfia iha prátika korrupsaun no nepotizmu”.

Nia esplika, regras ne’ebé mak iha katak, tuir duni órden ne’ebé mak fó-sai hosi aprovizionamentu, signifika projetu sira ne’ebé EDTL, E.P fó-sai ne’e publika iha EDTL,E.P nia pájina ofisiál, depois ema mai foti, tuir tenderizasaun depois ekipa juri halo avaliasaun, publika sai empreza manán na’in, depois iha loron sanulu hodi hein reklamasaun ruma bainhira laiha maka foin bá assina kontratu tuir baze legál ne’ebé iha.

Lee Mós: Adjudikasaun Direta bá Projetu 15 iha EDTL,E.P, Júlio Gonçalves Dezmente no Konsidera Laiha Prátika Korrupsaun-Nepotizmu

 Jornalista Estajiáriu : Lazaro Pereira Quefi