Hatutan.com, (06 Fevereiru 2024), Díli—Komisáriu Ezekutivu Korporativu (KEK) Eletrisidade Timor Leste Empreza Públika (EDTL,E.P), Júlio de Jesus Gonçalves, dezmente no deklara laiha adjudikasaun direta no prátika korrupsaun ho nepotizmu iha projetu 15 ne’ebé EDTL, E.P iha tanba prossesu hotu-hotu tuir prosedimentu normál no regra aprovizionamentu. 

Lee Mós: Projetu 15 iha EDTL,E.P Halo ho Adjudikasaun Direta Deskonfia iha Pratika Korrupsaun no Nepotizmu

Komisáriu Ezekutivu Korporativu (KEK) Eletrisidade Timor Leste Empreza Públika (EDTL,E.P), Júlio de Jesus Gonçalves. Foto/EDTL,E.P

Júlio de Jesus Gonçalves deklera ida-ne’e atu responde de’it kona-bá notísia ne’ebé fó-sai iha Hatutan.com, Segunda (05/02/2024), ho titulu “Projetu 15 iha EDTL,E.P halo ho adjudikasaun direta deskonfia iha prátika korrupsaun no nepotizmu”.

“Atu klarifika no informa de’it katak iha EDTL, E.P buat ida adjudikasaun ne’e laiha. Projetu hotu-hotu ne’ebé empreza ka kompañia 15 ne’ebé mak Hatutan.com publika ne’e tuir buat ne’ebé mak iha regra,” nia heteten bá Hatutan.com, iha knaar fatin Caicoli, Tersa (06/02/2024).

Nia esplika, regras ne’ebé mak iha katak, tuir duni órden ne’ebé mak fó-sai hosi aprovizionamentu, signifika projetu sira ne’ebé EDTL, E.P fó-sai ne’e publika iha EDTL,E.P nia pájina ofisiál, depois ema mai foti, tuir tenderizasaun depois ekipa juri halo avaliasaun, publika sai empreza manán na’in, depois iha loron sanulu hodi hein reklamasaun ruma bainhira laiha maka foin bá assina kontratu tuir baze legál ne’ebé iha.

Nia fó ezemplu katak, iha projetu ho númeru RFP/0080/EDTL,E.P-2023, EDTL, E.P loke dokumentu iha loron 17 fulan-Novembru 2023, iha oras 15:00 OTL, empreza sira hatama dokumentu, iha empreza rua mak hatama dokumentu, ida mak Pax Proctetor Unipessoal, LDA no ida maka Gardamor Security.

Bainhira sira hatama dokumentu mai, nia hatutan, ekipa juri halo sira nia servisu hodi verifika tuir buat hotu-hotu tuir regra aprovizionamentu ne’ebé mak iha, bainhira prosesu sira ne’e remata tiha se mak sai nanán na’in EDTL, E.P publika durante loron sanulu (10) atu hein reklamasaun ruma, bainhira laiha reklamasaun maka hakat ba assina kontratu.

“Dokumentu hotu-hotu ne’ebé fó-sai iha ne’e, hotu-hotu tuir regra aprovizionamentu, la iha ema ida atu kontra regra aprovizionamentu, tanba ita aplika lei aprovizionamentu foun ne’ebé mak iha. Katak, sasan hotu-hotu tenke tuir regra aprovizionamentu no laiha ema ida atu ajudika direta ba ema ida,” Júlio de Jesus Gonçalves esplika.

Komisáriu Ezekutivu EDTL,E.P ne’e esplika liután, liafuan ida intensaun bá ajudikasaun ne’e maka dala ruma ema hanoin katak EDTL,E.P halo ajudikasaun direta bá empreza ruma, la’e tanba buat hotu-hotu liu hosi prossesu aprovizionamentu normal no bainhira empreza ne’e manan ona maka foin ajudika bá nia ho kontratu ne’ebé tuir Lei aprovizionamentu iha.  Tanba, laiha ema ida bele halo ajudikasaun ba kompañia ida seim  liu hosi prossesu aprovizionamentu.

Nia mós klarfika katak, atu sosa de’it bee ka gastu ne’ebé ho montante US$100.00 bá leten tenke aplika Request of Quotation (RFQ), ne’ebé atu fó de’it bá empreza ida atu manán de’it US$100.00 ka $1000.00 ne’e laiha, tanba hotu-hotu tenke tuir regra aprovizionamentu.

“Ida ne’e mak ha’u hakarak atu hateten ba ekipa, dala barak ema hanoin ita ajudika, la’e. Buat ne’ebé imi hakerek ne’e la loos. EDTL,E.P iha regra aprovizionamentu no regra ida-ne’e aplika ba instituisaun hotu kedan,” nia dezmente.

Hanesan komisariu ezekutivu, nia  simu relatóriu hosi parte aprovizionamentu, iha ne’eba iha ekipa juri ne’ebé halo hotu servisu selesaun no buat hotu tuir Lei no regra inklui prosedimentu legál sira ne’ebé iha, hafoin de servisu sira aprovizionamentu nian remata maka lori mai komisaun ezekutivu EDTL,E.P nian haree hodi anunsia.

“Maibé atu klarifika tan katak, prosesu hotu-hotu ba prosesu tenderizasaun iha EDTL,E.P hahú hosi aviza ne’e sai, loke dokumentu sira ne’e, análiza no kona-bá presu kuotasaun sira ne’e, iha aprovizionamentu nia servisu tanba iha ne’eba iha ekipa juri no servisu sira juri nian komisaun ezekutivu EDTL,E.P sira la intervén. Bainhira juri servisu hotu ona mai iha parte jurídiku haree loos ona maka ezekutivu sira foin aprova katak, prossesu tomak bele publika ona. Katak se mak manán, no bainhira iha loron 10 nia laran maka laiha reklamasaun ita bele avansa ba kontratu,” nia esplika tán.

Servisu aprovizionamentu no servisu sira juri nian, komisaun ezekutivu EDTL,E.P sei la halo intervensaun, no servisu sira aprovizionamentu no ekipa juri halo ne’e indepente, tanba parte jurídiku mak haree buat hotu tenke tuir regra no Lei sira aprovizionamentu nian.

Ikus liu Komisáriu ne’e dehan bá parte Hatutan.com katak liafuan ida ajudika no prátika korrupsaun no nepotizmu ne’e la loos, EDTL,E.P iha regra aprovizionamentu no ida-ne’e aplika bá instituisaun hotu kedan.

Jornalista: Vito Salvadór