Hatutan.com (24 Outubru 2023) Díli—Mákina x-ray sira ne’ebé monta iha postu integradu fronteira Batugade, Postu Administrativu Balibo, Munisípiu Bobonaro ho postu integradu Salele, Munisípiu Covalima, funsiona ho di’ak  hodi fasilita servisu seguransa no kontrola iha postu integradu rua ne’e.  

Lee Mós: Inaugura iha 2012, Funsionamentu Merkadu Fronteira Batugade Laiha Serteza

Mobile x-ray iha Postu Integradu Fronteira Batugade funsiona ho di’ak. Foto/Francisco Simões

Dezde 2019, 2022 ho 2023, Governu investe orsamentu besik millaun Ida USD (US$1.000,000) hosi sosa pakote x-ray  monta iha postu integradu fronteira Batugade no Salele, kompostu hosi x-ray mobile, x-ray hand carry ho x-ray body scanner.

Komisáriu Autoridade Aduaneira ka  Alfandéga, José António Fátima Abílio bá Hatutan.com iha nia servisu fatin, Tersa (24/10/2023), hateten x-ray hirak-ne’e nia funsionamentu to’o oras ne’e di’ak loos.

“X-ray sira ne’e komesa husi ita simu, nia avaria iha problema nia sistema oan sira ne’e, x-ray city scan husi bagajen nian ne’e uluk UPS nian ne’e depois sira troka bá ida diak nian ne’e agora la’o normal,” José António Fátima Abílio esplika.

Nia informa, mákina x-ray ne’ebé avaria iha tinan 2017 tanba nia UPS la’ós orijinál, hodi nun’e deside lori foun mai troka no agora la’o normál. Ne’e mós kona-bá hand cary nian iha arrived nian ne’ebe konsege avaria kuaze lori tempu naruk hamenu fali husi Xina no konsege rezolve ona.

“Kona-ba mobile x-ray ida ne’ebe at hahú husi 2017 ne’e x-ray antigu nian. Ida-ne’e uluk, agora x-ray ida ita lori bá ne’e funsiona hela,” nia esklarese tan.

Pakote x-ray hanesan mós monta ona iha postu integradu fronteira Salele, Munisípiu Covalima. Nune’e, iha postu integradu rua; Salele ho Batugade iha hotu ona x-ray hand carry, mobile x-ray atu halo scan bá kareta sira-ne’e.

Kona-bá x-ray ne’ebe avaria desde 2017  sobu ona no la halo manutensaun, tanba  tuir José António Fátima Abílio katak kustu manutensaun boot liu fali kustu bá sosa x-ray foun, tanba ne’e, Governu deside sosa fali x-ray foun ne’ebé dau-daun ne’e utiliza ho di’ak tebes.

X-ray hand carry iha postu integradu fronteira Batugade. Foto/Francisco Simões

Dau-daun ne’e x-ray ida ne’ebe uza mak marka neutex nian ne’ebé iha kedan nia tekníku rasik hodi bele responde lalais problema ne’ebé mak mosu iha postu  integradu Salele ho Batugade.

Alfandéga nia funsionariu ne’ebe destaka iha postu integradu Salele ho Batugade  orienta karreta hotu bainhira atu bá halo x-ray keta kose no tenke kumpre regra ka standar operasionál prosedúr (SOP) ne’ebé estabelese ona hodi garante x-ray  labele aat tanba investimentu bá x-ray ne’e osan boot.

Dau-daun ne’e numeru X-ray ne’ebe instala fronteira hamutuk ne’en, mak hanesan  mobile x-ray iha rua, ida iha Salele no ida iha Batugade, hand cary ne’e mós iha haat, rua iha Salele no rua iha Batugade. Ida iha departure, ida ho arrived.

Hadia Ekipamentu Ne’ebé Avaria Inklui Fatin Servisu

Forum ONG Timor Leste (FONGTIL) husu bá ofisiál Alfándega sira nasionál atu halo inspesaun bá iha postu integradu kada semana ka kada fulan atu tau matan bá sasán sira inklui fatin servisu hodi hasa’e kualidade atendimentu iha fronteira.

Parte hosi Alfandéga ne’ebé mak halo jestaun kona-bá ekipamentu x-ray sira ne’ebe mak Guvernu sosa no instala iha fronteira hodi halo ezaminasaun bá sasán sira ne’ebe mak tama iha rai Timor-Leste.

Mobile X-ray iha Postu Integradu Fronteira Batugade funsiona ho di’ak. Foto/Francisco Simões

Direktur Ezekutivu FONGTIL, Valentim da Costa, hateten investimentu Estadu nian hodi monta x-ray sira iha postu integradu sira, inklui iha aeroportu internasionál Prezidente Nicolau Lobato, bele ajuda di’ak liu ofisiál Alfandéga sira bele servisu lalais liu ho seguru.

“Ha’u Hanoin Governu presiza tau osan hodi hadi’a ita-nia ekipamentu sira hodi bele ajuda ita-nia servisu sira iha fronteira. Bainhira ita servisu hanesan manual ne’e bele tama iha tentasaun ruma ne’ebe mak ladun kontribui bá servisu sira,” Valentim da Costa bá Hatutan.com iha nia servisu fatin.

Tuir nia, meius ida ne’ebé di’ak hosi superiór  intstituisaun relevante bá fasilidade sira ne’ebé instala iha postu integradu sira mak tenke kontrolu beibeik nia kondisaun sira ne’e.

Jornalista: Leopoldina de Carvalho/Lazaro Pereira Quefi