Hatutan.com, (09 Fevereiru 2024), Díli—Bankada FRETILIN iha Parlamentu Nasionál (PN) hein hela rezultadu fiskalizasaun abstrata hosi Tribunal Rekursu (TR) bá Lei Indultu ne’ebé bandaka ne’e submete ona iha fulan hirak bá kotuk.

Xefe Bankada FRETILIN iha PN, Aniceto Guterres. Foto/Elio dos Santos da Costa.

Xefe bankada FRETILIN Aniceto Guterres Lopes hateten, Lei ne’e fó kompeténsia bá Prezidente Repúblika hodi fó indultu bá prizioneiru sira ne’ebé presiza, nune’e,  bankada ne’e kontinua hein rezultadu.

Lee Mós: Lei Indultu Fó Kompeténsia bá Xefe Estadu Perdua Pekadór Sira Nu’udár Umanu

“Agora sei iha prosesu hela. Ita hein desizaun Tribunál Rekursu nian, konstitusionál ka la konstitusionál, maibé bainhira Tribunál dehan inkonstitusionál ita hotu tenke kumpri tanba iha Timor ne’e laiha ema ida iha Lei nia leten,” Aniceto Guterres Lopes hateten iha Parlamentu Nasionál, Sesta (07/02/24).

Bankada FRETILIN iha deputadu na’in-19 ne’ebé rekere fiskalizasaun abstrata bá Tribunál Rekursu no nafatin hein desizaun.

Bankada opozisaun ne’e mós kestiona kona-bá Dekretu Lei númeru 5/2016 ne’ebé iha artigu balun  ko’alia kona-bá krime korrupsaun no krime kontra terrorizmu, ne’e elemina tiha hodi fó kompeténsia tomak bá Prezidente Repúblika atu fó indultu bá kualkér krimozu.

Iha fatin hanesan, deputadu Patrocinio Fernandes hosi bankada CNRT hateten, bainhira Lei ida sai hosi Parlamentu Nasionál, ne’e signifika Parlamentu nian la’ós Komisaun A nian inkluí la’ós bankada oposizaun nian.

“Bankada oposizaun sira ne’ebé hatama fiskalizasaun abstrata bá iha Tribunál Rekursu, sira mós hola parte iha desizaun ida ne’ebé rezultadu bá Lei ne’e, maski sira nia posizaun votu ne’e kontra, maibé ne’e direitu sira nian,” Patrocinio Fernandes hateten.

Deputadu ne’e mós informa katak, Tribunál Rekursu haruka ona karta notifikasaun bá Parlamentu Nasionál no Parlamentu Nasionál fó ona resposta.

“Desizaun Tribunál nian ne’e Tribunál rasik mak iha kompeténsia bá ida-ne’e. Bankada oposizaun hala’o ninia knaar no bankada Governu mós hala’o ninia knaar,” Patrocínio subliña.

Lee Mós: Aprovasaun Projetu Lei Prosedimentu Konseisaun Indultu, JSMP Husu Xefe Estadu Tetu no Alkatiri Kontra

Jornalista Estajiária: Zita Menezes