Hatutan.com, (09 Fevereiru 2024), Díli—Bankada FRETILIN iha Parlamentu Nasionál (PN) kontinua sei la fó apoiu bá kandidatu komisáriu Comissão Anti Corupção (CAC) ne’ebé Governu aprezenta bainhira la kona laran ka la tuir preferénsia.
Membru Bankada FRETILIN iha Parlamentu Nasionál (PN), Joaquim dos Santos.
Deputadu bankada FRETILIN, Joaquim dos Santos Borululi hateten asuntu ne’e iha Parlamentu Nasionál, Sesta (09/02/2024).
Lee Mós: Posibilidade Mosu Kandidatu Foun bá Komisáriu CAC
“Sé kandidatu ne’e mai maka kona ita nia laran ita apoia. Sé la kona ita-nia laran, maiória bele apoia bá,” deputadu ne’e hateten.
Deputadu opozisaun ne’e fundamenta katak, ne’e pozisaun polítiku tanba komisáriu CAC ne’e ema ne’ebé atu garante duni ezersísiu Governante no funsaun públiku nian atu hala’o sira-nia knaar labele fó prejuizu bá ema seluk nian direitu.
Nia fó ezemplu katak, CAC ninia funsaun atu tau-matan bá funsionáriu públiku nune’e servisu manán loos de’it nia saláriu no labele halo tán buat seluk, alende ne’e Ministru no deputadu sira manán sira nia saláriu de’it no labele liman kadiuk tun kadiuk sa’e.
“CAC moris ne’e atu haree ida-ne’e. Depois, Lei fó tán kompeténsia atu halo investigasaun kriminál bainhira hetan delegasaun hosi Ministériu Públiku,” nia subliña.
Maski nune’e, bankada FRETILIN mós apresia bainhira Governu iha duni ona inisiativa hakarak atu aprezenta ona kandidatu komisáriu CAC no bainhira hetan duni aprovasaun, ne’e di’ak liu tán.
FRETILIN mós fó kritéria katak, kandidatu bá komisáriu CAC tenki moos hosi problema justisa, tenke iha bom komportamentu no labele iha kazu ruma iha Tribunál, tenki inparsiál no iha relasaun di’ak ho ema hotu-hotu, administrasaun no Governu.
Iha fatin hanesan deputadu bankada CNRT, Patrocinio Fernandes hateten, Komisáriu bá CAC ne’e instituisaun Estadu nian atu servi Estadu no la’ós atu servi bankada CNRT.
Tanba ne’e, nia hatutan, Lei fó kritéria ida katak forum ne’e tenki deputadu na’in 49, signifiká, bainhira bankada Governu la halo movimentu polítiku sei la konsege halo tuir ezijénsia Lei nian, prosesu ne’e iha hela Governu.
Entaun, Parlamentu Nasionál hein hela Governu atu aprezenta kandidatu mai depois Parlamentu bele halo nia servisu tuir Lei haruka.
Deputadu ne’e mós hatutan, bankada oposizaun iha obrigasaun no devér atu koopera no kolabora bá funsionamentu instituisaun CAC nian.
Jornalista Estajiária: Zita Menezes