Hatutan.com, (23 Fevereiru 2024), Díli– Membru Parlamentu Nasionál hosi Bankada CNRT, Patrocínio dos Reis Fernandes, husu bá autoridade polisiál, Ministériu Públiku no Tribunál atu prosesa kazu hatama ai-moruk ilegál tanba fó prejuizu bá Estadu.
Lee Mós: Deskonfia Fa’an Ilegál Ai-moruk Item Neen iha Farmásia Moris-Foun, Polísia Detein Suspeitu Na’in-tolu
Polísia monta hela Police line iha Farmásia Moris-Foun, Colmera, Díli, Kinta (22/02/2024). Foto/Elio dos Santos da Costa.
“Ilegál tenke detein, polísia sira-nia servisu maka ne’e. Husu bá parte hotu-hotu, la’ós de’it parte Polísia, maibé parte Intelijénsia, Komisaun Anti Korrupsaun (CAC, sigla portugés), Ministériu Públiku no instituisaun Estadu nian sira, presiza iha koordenasaun tau matan bá asuntu sira hatama ai-moruk ilegál ne’ebé fó prejuizu bá Estadu,” Deputadu Patrocínio Fernandes, bá jornalista sira iha Uma Fukun, Parlamentu Nasionál, Kinta (22/02/2024).
Nia dehan, karik ai-moruk sira tama ilegál sé laiha kontrolu ho di’ak, la prienxe rekizitu no padraun Ministériu Saúde ka sistema saúde Timor-Leste sei prejudika bá saúde públika.
“Se laiha kontrolu ne’ebé di’ak bá ai-moruk ne’e maka, ninia implikasaun ne’e boot. Mais, ha’u atu dehan, sé Polísia atua ona hakarak fó parabéns bá sira-nia servisu,” Deputadu Patrocínio Fernandes hateten.
Iha fatin hanesan membru Bankada FRETILIN, Joaquin dos Santos afirma Ministériu Públiku tenke iha inisiativa hodi halo investigasaun bá kazu refere tanba pratika ne’e krime.
“Ne’e krime, órgaun kompetente tenke halo intervensaun no fiskalizasaun tanba ne’e sei prejudika Saúde Públiku no hanoin Ministériu Públiku tenke foti inisiativa halo prosesu investigasaun kle’an,” Deputadu Joaquin dos Santos afirma.
Aprezenta Suspeitu Sira bá Tribunál
Polísia Nasional Timor Leste (PNTL) liu hosi Departamentu Investigasaun Kriminál (DIK) Nasionál hamutuk ho tékniku sira Ministériu Saúde nian, iha loron 21 fulan-Fevereiru 2024, ezekuta mandadu detensaun, apreensaun no buska bá Farmásia Moris Foun ne’ebé lokaliza iha Colmera, Díli.
Parte kompetente sira buska armazén no kontentór ne’ebé mak Farmásia Moris Foun foin hatama mai Timor-Leste iha Portu Baía-Tibar.
“Hosi fatin hirak ne’ebé mak ami halo apreensaun no buska, ami deteta krime kontra artigu lubuk ida,” Xefe Departamentu Investigasaun Kriminál, Superintendente Polísia, João Belo dos Reis, informa liuhosi konferénsia imprensa iha Kuartél Jerál PNTL.
PNTL haree katak aktu sira hosi jerente farmásia Moris Foun halo hodi hatama ai-moruk ilegál ne’e komete krime iha artigu 314, 315 , 316, 317, 303 no 304 kódigu penál (KP). Ho nune’e, haktuir bá mandadu Tribunál nian, konsege detein jerente na’in-tolu (3) no prende mós ai-moruk hamutuk item 150.
” Durante períodu oras 72 nia laran, PNTL aprezenta bá Ministériu Públiku hodi bele enkamiña bá Tribunál,” Superintendente Polísia, João Belo dos Reis hateten.
Suspeitu na’in-tolu nu’udár jerente Farmásia Moris Foun ne’e, na’in-rua (2) ho inisiál DIBS no JP nu’udár sidadaun Indonézia no ida seluk ho inisiál JP Timoroan.
Jornalista Estajiária/u: Zita Menezes/ Lazaro Pereira Quefi