Hatutan.com, (26 Fevereiru 2024), Díli-Prezidente Komisaun F Parlamentu Nasionál (PN) bá asuntu Saúde, Seguransa Sosiál no Igualdade Jéneru, Maria Barreto Gorumali, preokupa ho situasaun balun ikus -ikus ne’e relasiona ho    projetu adjudikasaun direta hosi Ministériu Saúde  bá empreza nasionál Sali-Magu hodi fornese ai-moruk ho karatér emerjénsia   bá Institutu Nasionál Farmásia no Produtu Medikamentu (INFPM).

Lee Mós: MS Loke Investigasaun Interna bá Projetu Fornesimentu sira Ne’ebé Deskonfia “Monopóliu” hosi Empreza 7

Nia hateten, projetu adjudikasaun direta bá empreza Sali-Magu hosi Ministériu Saúde ne’e aprova iha Konsellu Ministru no hetan vistu iha Tribunál Rekursu ka Tribunál das Kontas ho kustu besik millaun $6. 

Prezidente Komisaun F Parlamentu Nasionál bá asuntu Saúde, Seguransa Sosiál no Igualdade Jéneru, Maria Barreto Gorumali. Foto/Zita Menezes

“Komisaun F la halo fiskalizasaun tanba iha kinta lejislatura bainhira ami ezerse ami Komisaun F nia funsaun só hosi diresaun nasionál farmasia i médiku ne’ebé tutela iha Ministériu Saúde rasik sira loke uituan informasaun katak iha importador (26) ne’ebé maka ativa, maibé iha importador (6) maka ativa restu la ativa no depois to’o iha tenderizasaun ai-moruk bá iha SAMES iha tempu ne’ebá entaun sira ne’ebé la ativa maka sai manan na’in bá tenderizasaun, sira ne’ebé ativa la manan tender. Maibé, la ko’alia klaru kona-bá kompañia sira ne’ebé manan tenderizasaun ka partisipa iha fornesimentu ai-moruk mai Timor ne’e iha kompañia ema estranjeiru ne’e sira la sita, soké iha ikus-ikus kuandu iha sesta lejislatura kuandu foti kestaun kona-bá kompañia Timoroan Sali-Magu ne’ebé hetan ajudikasaun direta hosi Ministériu Saúde  ida-ne’e sai problema,”Prezidente Komisaun F-PN, Deputada Maria Bareto Gorumali haktuir bá Hatutan.com iha PN, Segunda (26/02/2024)

Nu’udár bankada Governu responsavél mós asumi Prezidente Komisaun F buka informasaun no hetan duni no tanbasa maka Bankada Parlamentár balu preokupa bá iha Timoroan ne’ebé maka hetan tenderizasaun

“Nusa maka sira la preokupa bá iha ema estranjeiru sira ne’ebé maka hetan tenderizasaun tinan barak iha SAMES no fornese ai-moruk ho hanoin katak ema estranjeiru sira ne’e fornese ai-moruk osan sai bá liur, nusa maka ita la apoiu Timoroan rasik hodi investe fali osan iha ita nia rai laran,  ida-ne’e maka ami foin buka tuir fali informasaun katak iha duni pesoálmente mosu uituan-uituan katak iha duni fornesedór ka kompañia ne’ebé mai hosi ema portugésa, Indonézia Austrália no mós iha nasaun seluk ne’ebé maka sai importadór ai-moruk mai iha Timor no manan tender tinan barak nia laran iha SAMES,” Nia subliña

Nia haktuir komisaun F la hetan dadus ruma tantu hosi Governu anterior no Governu ida-ne’e la frakamente entrega dadus no komisaun F nia fiskalizasaun ne’e bá direta iha instituisaun no ospitál sira.

“Iha fiskalizasaun ne’e la entrega dadus frakamente mai ami, entaun ami buka fali liña seluk para oinsá bele hetan dadus ne’e ida ne’e mós fó atensaun bá ami komisaun F para bainhira ami tuun bá fiskalizasaun liu-liu hanesan iha INFPM ne’e ami tenke  husu dadus ne’ebé maka fó detaladu,” nia tenik.

Prezidente Komisaun F apoiu Ministra Saúde Élia A. A. dos Reis Amaral ne’ebé maka daudaun ne’e halo ona prosesu investigasaun interna bá kazu refere.

Tuir mai dokumentu sira ne’ebé Hatutan.com asesu kona-bá empreza estranjeiru sira manan projetu fornesimentu ai-moruk bá SAMES durante tinan barak nia laran, balun iha 2020, 2022 no 2023.

Jornalista Estajiária: Zita Menezes