Hatutan.com, (01 Marsu 2024), Díli– Kandidatu úniku Komisáriu Komisaun Anti Korrupsaun (CAC, sigla portugés), Rui Pereira, tau prioridade bá programa investigasaun kazu korrupsaun no sei garante imparsialidade CAC nian iha knaar sira.

Lee Mós: Governu Submete Ona Lista Rui Pereira bá Kandidatu Komisáriu CAC

Kandidatu úniku Komisáriu CAC, Rui Pereira. Foto/Tome da Silva

“Obrigadu bá partidu CNRT liuhosi Primeiru-Ministru Kay Rala Xanana Gusmão ne’ebé maka fó fiar nu’udár kandidatu  úniku bá komisáriu CAC hodi lidera CAC hanesan instituisaun estadu.  Fiar ne’e, la’ós ha’u mesak tinan kotuk ne’e ha’u ho dr. Sergio Hornai ne’ebé bá tiha ona Ministru Justisa, entaun lista hela na’in ida de’it tuir lista kandidatu ne’ebé maka iha. Tuir informasaun ne’ebé iha katak, Tersa (05/03/2024), iha eleisaun bá komisáriu CAC tantu bankada sira halo reuniaun ona no ha’u mós hetan ona oráriu,” antigu adjuntu Provedór Direitu Umanu no Justisa (PODHJ) ne’e hateten hodi responde Hatutan.com iha Díli, Sesta (01/03/2024).

Nia hateten, CAC la’ós instituisaun foun tanba iha 2016 to’o 2018 nia nu’udár ona adjuntu CAC bá área prevensaun ninian, tanba ne’e maka iha koñesimentu uitoan kona-bá saida maka CAC nia servisu no kompeténsia sira.

Tuir nia, servisu prinsipál CAC nian iha tolu; primeiru oinsá atu halo investigasaun bá kazu korrupsaun nian, segundu kona-bá prevensaun nian no ikus liu maka administrasaun nian.

“Ha’u hanoin oinsá atu halo jestaun bá rekursu sira iha  CAC no  baut ne’ebé presiza atu halo maka iha área investigasaun depois ita haree kazu hira maka pendente hela iha ne’ebá, hira maka presiza atu halo kontinuasaun, maibé prosesu sira ne’e CAC hanesan liman-ain Ministériu Públiku nian, tenta para iha kooperasaun servisu ne’ebé maka di’ak atu nune’e servisu ne’ebé CAC halo ne’e bele hetan rezultadu di’ak,” Rui Pereira hateten.

Kandidatu Komisáriu CAC ne’e mós haktuir importante liu maka oinsá programa CAC nian iha área prevensaun nian ne’ebé sai prioridade tanba bainhira kaer ema lori bá prizaun  ne’e estadu maka sei hasai despeza boot hodi  fó han-fó hemu.  

“Ita prevene ema labele halo korrupsaun ne’e di’ak, ha’u hanoin ho lei CAC nian ne’ebé maka tinan hira liubá aprová ne’e di’ak tanba bele ajuda ita-nia Governu no membru Governu sira halo jestaun. Ha’u hanoin ha’u la’ós ema foun iha área ida-ne’e tanba ita-boot sira hatene 2000 to’o 2005 ne’e nu’udár juis iha Tribunál Díli kastigu ema hosi ema ki’ik to’o em-boot depois hosi 2005 to’o 2008 ne’e servisu iha Komisaun Verdade no Amizade (CVA), depois fila mai asesór no fila-fali bá iha PDHJ adjuntu tinan haat boa Governasaun, purtantu área ida-ne’e la’ós buat foun ida,” nia hateten.

Nu’udár Adjuntu Komisáriu CAC iha 2016 to’o 2018, Rui Pereira hatene saida maka atu halo iha ne’ebá no komisáriu labele halo servisu mesak tanba sei forma nia adjuntu tolu ne’ebé sei haree ema ne’ebé maka sei eskolla para buat sira ne’e bele la’o di’ak.

“Maibé tanba buat politíka ne’e bele halo mudansa mós iha minutu balu nia laran tanba ne’e maka ha’u fó hela informasaun jerál, maibé espera katak fiar ne’ebé Governu tau iha ha’u nia kabas iha ona Parlamentu Nasionál nian oin, oinsá maka Bankada CNRT, FRETILIN, PD, PLP no KHUNTO bele aserta malu ho ha’u nian kandidatura no ha’u espera katak ho sira-nia apoiu servisu ne’e mais forte bá oin,” Nia hatutan.  

Jornalista Estajiária: Zita Menezes