Hatutan.com, (05 Marsu 2024), Díli-Polísia Nasionál Timor-Leste (PNTL) Munisípiu Díli, Tersa (05/03/2024), detein profesór kontratadu hamutuk na’in-ualu (8), inklui apoiante na’in-ida (la’ós profesór kontratadu) iha área Vilaverde tanba deskonfia halo manifestasaun ilegál tanba  laiha karta pedidu koñesimentu bá autóridade seguransa.

Lee Mós: Xanana husu Profesór Kontratadu Ne’ebé Kontratu Remata Tuir Prosesu Rekrutamentu

Komandate PNTL Munisípiu Díli, Superintendente-Xefe Orlando Gomes. Foto/Dok.Média PNTL

Komandante PNTL Munisípiu Díli, Superintendente Xefe Polísia,  Orlando Gomes, argumenta katak   tuir loloos atividade manifestasaun ne’ebé sidadaun sira hakarak  halo tenke submete karta koñesimentu bá  autoridade polísia  tuir Lei haruka.

“Ami halo kapturasaun bá profesór kontratadu sira. Sira laiha tán pedidu ida mai iha komandu para autoriza sira halo manifestasaun. Ne’e signifika katak, sira viola ona regra manifestasaun ninian. Ita kaptura sira iha kedas portaun, edifísiu ministériu edukasaun nian oin, no tuir loloos ne’e sein-metrus (100 metrus),” Komandante Orlando Gomes, informa.

“Iha manifestasaun ne’e, la’os de’it professór kontratadu sira, maibé, iha ema balu mós envolve hotu iha laran, agora dadauk ami kaptura, sira mak hanesan iha kotuk para dudu, mais, sira la hatene katak, ne’e vióla ona regara manifestasaun ninian. Segundu, sira halo obstrusaun bá autoridades, tanba ne’e maka, ita halo kapturasaun bá sira,” Orlando Gomes, informa.

Komandante PNTL Munisípiu Díli ne’e hatutan, durante manifestasaun ne’e, manifestante sira mós hakilar ho liafuan balu ne’ebé konsidera dezfama tebes lideransa balu ninia naran, iha espanduk.

Hafoin kapturasaun, Investigadór sira iha Eskuadra Vera Cruz, halo kedas prosesu identifikasaun no investigasaun, no prosesu hirak ne’e mós konklui ona. Oras ne’e, suspeitu sira detein ona iha sela detensaun Komandu Munisípiu Dili, durante oras 72. Enkuantu, autos sira, aprezenta ona bá Ministériu Públiku (MP), nune’e bele submete bá prosesu primeiru interrogatóriu iha Tribunál Judisial Primeira Instánsia Díli (TJPID).

Jornalista: Rogério Pereira Cárceres