Hatutan.com, (06 Marsu 2024), Díli—Sekretáriu Estadu Komunikasaun Sosiál (SEKOMS) hamutuk ho Ministériu Negósiu Estranjeiru no Kooperasaun (MNEK) hahú organiza hodi sosializa polítika Assosiasaun Nasaun Sudeste Aziátiku (ASEAN) iha área informasaun no mídia liu hosi habelar koñesimentu bá jornalista timoroan sira.

Sekretáriu Estadu Komunikasaun Sosiál (SEKOMS) hamutuk ho Ministériu Negósiu Estranjeiru no Kooperasaun (MNEK) hahú organiza hodi sosializa polítika Assosiasaun Nasaun Sudeste Aziátiku (ASEAN) iha área informasaun no mídia liu hosi habelar koñesimentu bá jornalista timoroan sira, iha otél Novo Turismo, Díli, Kuarta (06/03/2024). Foto: Elio dos Santos da Costa.

Sesaun ida-ne’e hala’o iha Kuarta, 06 fulan-marsu 2024, iha otél Novo Turismo, Díli ho objetivu atu hasa’e koñesimentu partisipante sira-nian kona-bá polítika ASEAN nian iha área informasaun no mídia, servisu kooperasaun ASEAN nian iha seitór informasaun no mídia no planu estratéjiku ASEAN iha parte informasaun no mídia tinan 2016-2025.

Lee Mós: Simeira ASEAN-Austrália Fortifika Solidariedade-Unidade bá Dezenvolvimentu Ekonómiku

Périt sira ne’ebé fahe koñesimentu ne’e mai hosi Sekretariadu ASEAN nian bá Divizaun Kultura no Informasaun.

Sekretáriu Estadu Komunikasaun Sosiál, Expedito Dias Ximenes hateten, hosi prespetiva mídia nian, adezaun Timor-Leste bá ASEAN importante tebes tanba Timor-Leste bele hetan oportunidade atu hola parte iha atividade rejionál sira ne’ebé iha relasaun ho seitór komunikasaun sosiál no bele promove interkámbiu mídia ho pais sira membru ASEAN.

Nia dehan, Timor-Leste hanesan nasaun foun no kiik ida, iha ne’ebé dezenvolvimentu mídia sei iha prossesu nia laran, nune’e presiza apreende hamutuk ho Estadu membru sira seluk ne’ebé avansadu ona iha teknolojia no infomasaun.

“Ita tenke konsiente katak ho avansu teknolojia iha era djitál maka ita sei hasoru dezafiu oioin bainhira Timor-Leste sai membru ASEAN tanba sei iha kompetisaun ne’ebé boot entre mídia sira, liuliu mídia sira ne’ebé mak avansadu ona iha país membru ASEAN nian ho mídia sira ne’ebé sei iha prossesu dezenvolvimentu nia laran,” Expedito Ximenes hateten iha diskursu.

Tanba ne’e, nia hatutan, relasiona ho preparativu sira bá integrasaun Timor-Leste nian ba organizasaun intemasionál ne’e, preparasaun iha seitór mídia mós sai nu’udár prioridade, liuliu presiza hadi’a kondisaun infraestrutura instituisaun mídia sira-nian.

Iha fatin hanesan Diretór Kontrolu Kualidade Grupu Média Nasional (GMNtv), Francedes Suni orgullu ho sesaun sira hanesan ne’e, no konsidera importante tebes tanba Timor-Leste halo ona servisu ida makas tabes atu sai membru plenu ASEAN nian.

Francedes Suni  dehan, partikularmente komunidade mídia iha Timor-Leste sei menus no seidauk kompriende buat barak, kompriensaun ladun adekuadu kona-bá organizasaun sira ne’ebé Timor-Leste atu sai membru bá.

“Ita agradese tanba ida-ne’e primeira sesaun, ita espera iha aban bairua sei iha tán sesaun seluk tán atu nune’e bele tulun ita iha komunidade mídia bele iha kompriensaun ida kle’an liu tán kona-bá komunidade mídia nia signifikadu ne’e saida ba ita nia servisu,” Francedes Suni hateten.

Partisipante iha sesaun ne’e maka jornalista sira hosi instituisaun públiku no privadu, na’in bá mídia sira, Rádiu Komunidade, Asosiasaun Jornalista, Sentru Informasaun Suku, Konsellu Imprensa, Sosiedade sivíl no entidade relevante sira.

Jornalista Estajiáriu: Lázaro Pereira Quefi