Hosi :  Nelion Ornai Monteiro

Alumnu Universitas Sanata Dharma, Yogyakarta hosi Fakuldade Filozofia no Teolojia Kentungan Wedha Bakthi 2019/2020.

 “Ami sei hamnasa imi sei triste no ami sei triste imi sei hamnasa”. Lema Polítika Ódiu-Vingansa.

Timor-Leste hanesan nasaun ida, iha nia soberania rasik ne’ebé independente no demokrátiku. Nasaun ida ne’ebé independénsia no demokrátiku tenkesér iha estratéjia polítika rasik. Ida-ne’e mak hanesan papél fundamental hodi deside planu ou mehi dezenvolvimentu nasaun nian. Maibé realidade, hatudu oin seluk, hahú hosi governu dahuluk to’o agora, dezenvolvimentu nafatin hakdasak tamba povu barak mak sei sai vítima ba bee-moos, eletrisidade, Estrada no seluk-seluk tan. Buat hirak ne’ebé sempre akontese iha sosiedade sira leet tamba estratéjia polítika la di’ak. Hanesan analiza privadu husi hakerek na’in, durante ne’e polítiku sira hamoris hela estratéjia polítika ida hanaran “Polítika Ódiu-Vingansa. Ikus mai hamosu pergunta, saida mak polítika ódiu-Vigansa? Tamba saida mak polítika Ódiu-Vigansa ne’e mosu? Hakerek na’in sei halo deskrisaun kle’an liu tan ba pergunta rua mak hanesan tuir mai ne’e.

Polítika Ódiu-Vingansa

Tuir opiniaun hakerek na’in nian, polítika ódiu-vingansa (Politik Pembalasan) katak estratéjia polítika ida ne’ebé insulta (tarata) no vinga malu. Estratéjia polítika ida-ne’e la saudavel tamba la fó benefisia ba dezenvolvimentu país nian. Dezenvolvimentu nafatin hakdasak tamba povu barak mak seidauk sente saida mak dezenvolvimentu.

Estuda hosi esperiénsia nasaun seluk sira nia mak nasaun Indonézia. Hosi era Soekarno ate Soeharto ukun, dezenvolvimentu hakdasak hodi hamosu kritika hosi akadémiku no ativista barak kona-ba dezenvolvimentu rai-laran. Maibé, sira barak mak lakon direitu moris tan de’it la simu kritika, opiniaun no sujestaun hosi ukun na’in polítiku sira. Ema sira lakon direitu moris mak hanesan Soetan Sahirir, Tan Malaka, Munir, Wiji Thukul, So Hogue, Marsina no sira seluk tan. Ida-ne’e mak rezultadu hosi polítika ódiu-vingansa rai-laran rasik hodi halakon direitu moris kualidade intelektuál akadémiku barak mak sai hanesan asset país nian.

Iha era Gusdur, Megawati to’o Habibi sira nia ukun hanesan era tranzisaun tamba sistema bongkar pasang dan pasang bongkar atu hodi buka figura ne’ebé kualidade mak bele lidera país ne’e atu hodi bele atinje dezenvolvimentu rai-laran. Mehi dezenvolvimentu nian sai realidade iha era Sosilio Bambang to’o Joko Widodo.

Esperiénsia nasaun seluk nian hanesan antesedénsia ba país ida ne’e atu hodi forma planu estratéjia polítika ida ne’ebé kualidade atu bele atinje mehi dezenvolvimentu país nian. Hanesan liafuan klásiku ida katak “Esperiénsia mak professor ida ne’ebé di’ak”. Liafuan klásiku ne’e atu esplika mai ita katak esperiénsia mais importante tebes mezmu esperiénsia ne’e ema seluk nian ou nasaun seluk nian tenkesér presiza hatene no sai referénsia atu hodi bele aplika no prátiku iha país ida ne’e.

Maibé realidade hatu hatudu oin seluk, iha país Timor-Leste adopta hela sistema polítika ódiu-vingansa. Sistema polítika ida ne’e, ita la haree ho matan maibé “iha” tamba liu husi sente. Polítika ida ne’e komesa tubun (bertumbuh) no buras (berkembang) hahú hosi governu anteriór dahuluk to’o IX Governu. Polítika ida-ne’e hamate tebes espíritu dezenvolvimentu rai-laran nian ne’ebé mak sai hanesan mehi ou papél importante husi povu territóriu Timor laran tomak nian.

Timor-Leste hamriik hanesan nasaun ida hahú husi governante dahuluk to’o agora sei iha hela de’it konflitu ida ne’ebé la merese atu mosu, maibé akontese dunik iha rai laran. Iha governu anteriór dahuluk, mosu konflitu lubuk boot ida mak hanesan relijiaun no konflitu   loro-monu no loro-sa’e. Iha oitavu governu mós sei mosu nafatin konflitu mak hanesan membru deputadu hodi baku fila meza iha uma fukun Parlamento. Ida seluk tan, governu ne’e hamosu tan toman ida la di’ak mak sistema partidarizmu, familiarizmu no kolorismo. Toman ida-ne’e hatudu klaru ba públiku katak ukun na’in polítiku sira nia interese personal boot liu interese komunál. Ikus mai, ida sai vítima mak funsionáriu kontratadu no povu ki’ik tamba ema sira ne’ebé hetan nomea husi partidu ba prienxe fali sira nia fatin. Sira ida hetan nomea husi partidu ne’e dala ruma la haree ba antesedénsia kualidade akadémiku nian tamba interese personal ne’e atu hasai kuantidade servisu família nian, partidu nian, no koor nian. Toman at ida ne’e bele dehan katak kontra Konstituisaun RDTL iha artigu 50/3 katak “Labele hasai ema servisu na’in sira bainhira la iha kauza justa (loloos) eh tan de’it motivu polítiku, relijiozu ka ideolójiku”. Lei ne’e esplika klaru, maibé ukun na’in polítiku sira sente masa bodoh katak sira nia sistema polítika ódiu vingansa la iha relasaun ho lei Konstitusionál ne’e rasik.

Haree husi lensa públiku, IX Governu mós sei nafatin hamoris hela sistema polítika ódio- vingansa. Realidade hatudu mai povu ho sira-nia sistema bongkar pasang funsionáriu sira tuir sira nia gostu. Profesores permanente barak mak husik hela sira nia profisaun hanesan professor hodi asume fali kargu foun iha fatin seluk mak hanesan administradór postu no knar sira seluk tan. Sistema ka modelu ida ne’e akontese iha Munisípiu Manufahi no ba munisípiu seluk hakerek na’in la hatene maibé deskonfia katak bele akontese mos.

Haree husi faktu jerál hirak ne’ebé deskobre ona iha parágrafu hirak iha leten katak polítika ódiu-vingasa ne’e sei iha nafatin tamba de’it sira nia interese personal ne’e as tebes. Toman at sira nian ne’e kontrovérsia ho lema Saudozu Fernando “La Sama” de Araújo katak “Ha’u nia dignidade la ás liu dignidade nasaun nian.” Figura polítiku sira hotu mak iha mehi ne’ebé hanesan ho figura ne’e espera katak dezenvolvimentu sei la hakdasak iha país Timor Leste. Maibé realidade, figura polítiku barak mak sei iha hela interese personal. Espera katak toman at ne’e iha tempu ida sei lakon husi país ne’e hanesan Saudozu Francisco Xavier do Amaral, dehan “Husik ba tempu mak sei termina se mak loos no se mak sala”.

Egosentrizmu

Polítika ódiu-vingansa ne’e mosu tamba karakteridade egosentrizmu husi figura polítiku sira nian. Sente ou la sente, figura polítiku barak mak uza ego (arrogánsia ou loko an) sai hanesan medium (sentru) ba sira an. Bainhira karakteridade ne’e mak domina ona iha ita an, ema seluk sempre la vale iha ita nia matan no sente katak ita mak perfeitu liu ema seluk no di’ak liu ema seluk. Iha matenek na’in Primeiru Vise Prezidente Indonézia Bung Hatta, dehan “Di atas langit masih ada langit”. Signifika katak labele loko an katak ita mak figura di’ak liu ema seluk tamba sei iha ema seluk sei di’ak liu ita. Tamba laiha umanu ida mak perfeitu hanesan liafuan osan mean husi lingua portugés katak “Nem Que Perfeito mais do que em Deus”. Signifika katak la iha ema ida perfeitu liu Na’i Maromak. Idea ne’e atu esplika klaru de’it katak bainhira asume knaar ruma tenkesér agradese hodi serbí povu no nasaun ho fuan la’os ho kakutak de’it. Serbí ho fuan dame no pás sei mosu no dezenvolvimentu sei la’o ho di’ak tamba ida ne’e mak sai hanesan kritéria importante tebes husi konseitu kristaun nian ba lideransa sira hanesan Fransiskus Asisi rasik haktuir katak “Menjadi tuan berarti harus menjadi hamba untuk melayani”. Idea ne’e atu esplika katak hakarak sai boot, maka tenkesér sai atan hodi serbí povu sira, la’ós povu sira mak atu serbí fali boot sira.

Konseitu lideransa ida kualidade figura polítiku barak mak lakohi hatoman an no banati tuir, maibé sira hakarak nafatin ida sai sentru hodi kontrola sira an mak ego (arrogánsia ou loko an). Maibé, sira la arrepende katak karakteridade ida ne’e mak halo hodi hamosu polítika ida la saudavel (ódiu-vingansa) iha rai laran. Tamba sira nia ukun ho modelu egosentrizmu ne’e halo maluk sira seluk laran moras no hodi halo promesa ba sira aan katak hein ami nia tempu fali mak halo fali ba imi lori sente.

Luka Batin (Laran Moras)

Polítika ódiu-vingansa ne’e mosu la’ós de’it tamba egosentrizmu maibe laran moras mós. Luka batin ne’e mosu tamba ho modelu ukun na’in polítiku sira nian ho hahalok ida ne’ebé egosentrizmu. Hanesan exemplar, bainhira ha’u mak kaer ukun iha dana sosial (subsídiu) fahe de’it ba família, maluk partidu sira no ami sira koor hanesan. Modelu ida ne’e hodi hamosu ona ema seluk luka batin (laran moras). Iha tempu ne’ebá kedas, ema sira ne’e hodi halo promesa ba sira aan katak hein de’it ami nia tempu fali mak imi sei haree de’it sá. Sistema ida ne’e mak hanaran katak polítika ódiu-vingansa.

Haree hosi faktu konflitu hirak ne’e, hakerek na’in analiza dehan katak “Polítika ódiu-vingansa sei nafatin buras hela iha país Timor-Leste. Polítika ida-ne’e iha dunik, maibé la haree ho matan no bele sente. Bainhira, ukun na’in polítiku sira la arrepende ba polítika ódiu-vingansa, maka dezenvolvimentu nafatin hakdasak iha país ida-ne’e no konflitu sei iha nafatin to’o hamosu tan krize iha país ida ne’e mak foin arrepende katak polítika ida ne’e la iha benefísiu sustantival iha rai laran.

Opiniaun ne’e atu hateten de’it katak polítika ódiu-vingansa la iha benefisia ba dezenvolvimentu ba país ne’e. Tan ne’e figura polítiku sira tenkesér prevene aan husi estratéjia polítika ne’e ho maneira halakon toman at ida egoisentris. Hahalok ida ne’e iha parte ida la di’ak tanba bele halo ema seluk luka batin (laran moras). Bainhira iha ona laran moras, entaun iha ona sentimentu atu Balas dendam (halo liu malu). Ho toman at hanesan ida-ne’e nafatin dezenvolvimentu nafatin hakdasak iha ita nia rai laran. Tan ne’e mak hakribi tia hahalok at sira ne’e hotu hodi bele atinje mehi dezenvolvimentu rai laran atu povu sira bele sente katak ida ne’e mak dezenvolvimentu. ***