Hatutan.com, (18 Marsu 2024), Dili—Iha Kinta (22/02/2024) oras kalan, mosu insidente omesídiu ida iha área Kampung Baru, Suku Comoro, Postu Administrativu Dom Aleixo, Munisípiu Díli.

Komandate PNTL Munisípiu Díli, Superintendente-Xefe Orlando Gomes. Foto/Dok.Média PNTL

Insidente ne’e involve hosi suspeitu na’in-rua ne’ebé kondús motór halai besik bá vítima Luis Vicente Tout, ne’ebé tuur hela hodi lori kro’at atu hanesan samu-rai ta’a kedan bá vítima nia kotuk laran.

Lee Mós: Polísia Kaptura Suspeitu Ida Envolve Kazu Taa Luis Vicente iha Kampu Baru

Hosi vídeo gravasaun CCTV ho durasaun minutu 08.16 ne’ebé virál iha média sosiál hatudu vítima la uza faru tuur, hela iha estrada-ibun, derrepente suspeitu na’in-rua kondús motór halai rabat mai vítima ta’a kedan vítima nia kotuk laran.

Hafoin ta’a vítima, suspeitu na’in-rua halai liu kedan no vítima sofre kanek iha parte kotuk-laran, kabas, no liman-kabun.

To’o iha Sesta dadeer, Polisia Nasionál Timor-Leste (PNTL), Komandu Munisipiu Dili, liuhosi eskuadra Dom Aleixo, bá transporta vítima hodi hala’o tratamentu saúde intensivu iha Hospital Nacionál Guido Valadares (HNGV), Bidau.

Hafoin kazu insidente ne’e, Komandu PNTL Munisipiu Dili, lansa nia ekipa sekreta no mós liuhosi atividade operasaun, konsege halo kapturasaun bá suspeitu ida ho naran inisiál JF no detein iha sela durante oras 72, tanba deskonfia JF mak ho ninia kolega ida seluk iha tempu ne’ebá, kondús motór hodi ta’a vítima Luis Vicente Tout iha estrada ibun, besik eskola 05 de Maiu, Kampu Baru, Comoro, Díli.

“Ita lansa nafatin ita nia informadór sira atu nafatin buka-tuir suspeitu sira ne’e,” Komandante PNTL munisipiu Dili, Superintendente Xefe Polisia Orlando Gomes hateten iha kna’ar fatin, Segunda (18/03/2024).

Komandante Orlando Gomes hatutan, kazu tentativa omesídiu ne’e deskonfia alastra to’o ona Bebora iha ne’ebé suspeitu nain-rua ne’e kondús motór lori samurai ta’a karreta Grand Max ida no momentu ne’ebá Polisia patrullamentu Dom Aleixo duni tuir konsege kaptura suspeitu ida,  infelizmente, ida seluk ho motór halai liu.

“Kazu ida agora ne’e konsidera kazu arma branka ne’ebe uza sasán kro’at halo sirkulasaun iha tempu kalan hodi ta’a ema. Iha momentu ne’ebá ita-nia Polísia patrullamentu kaptura kedan depois submete kedan mai iha ne’e hodi halo prosesu investigasaun,” Orlando Gomes informa.

Komandu PNTL Dili hatene ona katak, grupu ida-ne’e ninia movimentu maka iha oras madrugada, tanba ne’e, Superintendente Xefe Polisia Orlando Gomes alerta ona bá PNTL Díli hodi esforsu oinsá halo movimentu maka’as liu iha tempu kalan to’o iha oras madrugada atu prevene asaun kriminál sira ne’ebé mak mosu iha sidade ne’e.

Jornalista: Rogério Pereira Cárceres