Hatutan.com, (18 Marsu 2024), Díli-Reprezentante povu iha Parlamentu Nasionál (PN) konsidera timoroan barak iha Timor-Leste seidauk iha konsiénsia soe lixu iha leixaira ka fatin soe lixu nian.

Lee Mós: Tempu Ona Atu Hamoos-Hadi’a Sidade Díli Hosi Lixu no Fahi-Luhan

Valeta ne’ebé nakonu ho lixu no intupidu iha aldeia 05, Suku Fatuhada, Postu Administrativu Dom Aleixo, Munisípiu Díli,.Foto/Dok

“Lixu iha kapitál Díli, munisípiu no postu administrativu sira, kuaze soe nar-naran de’it, no iha semana nia rohan, lixu namkari tama to’o estrada laran, ne’e hatudu ita Timoroan mak atu lakon ona ita nia konsiénsia atu kontribui bá sidade limpu ka sidade moos,” membru PN hosi Bankada CNRT, Oscar de Araujo, hato’o kestaun ne’e  iha plenária PN, Segunda (18/03/2024).

Nia husu bá ministériu relevante sira atu servisu hamutuk ho Prezidente Autoridade Munisípiu no administradór sira hodi bele kontrolu  didiak lixu sira ne’ebé tau iha fatin-fatin

Vise-Ministru asuntu Parlamentár, Áderito da Costa Hugo, hateten nia sei relata preokupasaun sira ne’e  bá ministériu relevante sira hodi buka solusaun.

Jornalista Estajiária: Zita Menezes