Hatutan.com, (20 Marsu 2024), Díli-Polísia Nasionál Timor-Leste (PNTL), Kuarta (20/03/2024), hale’u tuku 15:30 Otl, kaptura suspeitu na’in-neen (6) ne’ebé envolve iha kazu konfrontu entre juventude bairu Mascarenhas ho Quintál-Boot, Munisípiu Díli.

Lee Mós: Polísia Kontinua Buka-tuir Autór Prinsipál Ne’ebé Ta’a Luis Vicente iha Kampung Baru

Suspeitu na’in-6 ne’ebé Polísia kaptura iha kazu konfrontu iha Mascarenhas, Postu Administrativu Vera Krus, Munisípiu Díli, Kuarta (20/03/2024). Foto/Espesiál

“Suspeitu sira ne’e ami halo kapturasaun, ohin, tanba envolve iha kazu konfrontu entre juventude bairu Mascarenhas ho Quintál-Boot,” Komandante Operasaun PNTL Munisípiu Díli, Inspetór Xefe Polisia José Amaral, informa iha via Whatsapp.

Dadaun ne’e ekipa investigadór sira iha Seksaun Investigasaun Díli nian halo hela identifikasaun, hodi bele buka hatene identidade hosi suspeitu ka autór sira, no motivu hosi konfrontu ne’e.

Bainhira iha indísius katak, krime ne’e mak rezulta vítima balu gráve no asaun ruma mak autór sira halo, estraga komunidade nia sasán, maka ekipa investigasaun sei halo kedas detensaun bá suspeitu sira durante oras 72 nia laran no iha biban hanesan, komunika kedan ho Prokuradór sira iha Ministériu Públiku (MP) hodi submete bá prosesu primeiru interrogatóriu judisial  bá iha Tribunál Judisial Primeira Instánsia Díli (TJPID).

Jornalista: Rogério Pereira Cárceres