Hatutan.com, (23 Marsu 2024), Díli— Fujitivu red notice hosi Organizasaun Internasionál Polísia Kriminál (INTERPOL, sigla ingles) ho naran kompletu Arnolfo “Arnie” Alipit Teves Jr ka Arnolfo Teves Jr, tama iha territóriu Timor-Leste iha loron (la fiksa), fulan-Abríl 2023 ho aviaun jet privadu hamutuk ho nia feen no oan-feto.

Lee Mós : Fujitivu Arnolfo Teves Jr, Komete Krime Asasinatu iha Filipina Subar iha Timor-Leste

Bainhira fujitivu Arnolfo Teves Jr ho nia fen no oan-feto to’o iha aeroportu Internasionál Prezidente Nicolau Lobato, Díli iha fulan-Abríl 2023. Foto/supply

Bainhira Arnolfo Teves Jr ne’ebé sai hanesan autór bá kazu omisídiu oioin iha provínsia Negru Oriental, Filipina, to’o iha Aeroportu Internasionál Prezidente Nicolau Lobato, Díli,  tempu ne’ebá, deskonfia simu direta hosi asesór prinsipál balun hosi órgaun Estadu Repúblika Demokratika Timor-Leste (RDTL) nian. 

Informasaun seluk ne’ebé Hatutan.com simu hosi fonte importante balun hateten, asesór prinsipál hosi órgaun Estadu RDTL nian ne’e bá simu fijitivu ho nia família hanesan estratéjia ida, oinsá mak fujitivu INTERPOL nian ne’e (Arnolfo Teves Jr_red)  bele sai hosi nia subar fatin hodi bele hafasil INTERPOL deteta no halo kapturasaun.

Durante hela iha  Díli-Timor-Leste,  Arnolfo Teves Jr halo esforsu oioin atu bele hetan azilu polítika, inklui halo komunikasaun ho figura importante balun iha Timor-Leste  atu bele fasilita nia tama Eropa, maibé esforsu sira-ne’e la konsege no la hetan aseitasaun.   

Iha Sesta kalan to’o Sábadu loraik  (22-23/03/2024), autoridade polisiál Timor-Leste ho autoridade judisiáriu sira lori fujitivu  Arnolfo Teves Jr submete bá primeira interrogatóriu judisiál iha Tribunál Supremu Justisa Timor-Leste nian.

Iha kontinuasaun primeiru interrogatóriu judisiál ne’e, juis Tribunál Supremu Justisa deside prizaun preventiva bá  Arnolfo Teves Jr.

Jornalista sira tenta ona atu halo konfirmasaun ho ekipa advogadu hosi Arnolfo Teves Jr nian, maibé sira seidauk bele fó informasaun hodi hein prosesu bá oin.

Arnolfo Teves Jr nia fen ho oan-feto. Foto/supply

Iha audiénsia primeira interrogatóriu ne’e, fujitivu Arnolfo Teves Jr hatán asisténsia legal hosi advogadu na’in-neen (6), kompostu hosi advogadu timoroan na’in-haat (4) no advogadu internasionál na’in-rua (2).

Eis membru Parlamentu Filipina ne’ebé reprezenta provínsia Negru Oriental sai hanesan autór kazu asasinatu oho ema na’in-sia (9) inklui Governadór  Negru Oriental, Roel de Gamo hetan kapturasaun no detensaun  hosi autoridade Polisiál Timor-Leste bainhira halimar hela golf iha área balun iha Díli laran, Kinta loraik, 21 fulan-Marsu 2024, hale’u tuku 16:00 Otl.

Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu (ATC, sigla inglés) hasai rezolusaun númeru 43 (2023) hodi konsidera  Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.

Jet privadu ne’ebé trnasporta fujitivu Arnolfo Teves Jr mai TL iha fulan-Abríl 2023. Foto/supply

Eis  lejizladór Falipina nian ne’e rejista hanesan red notice Organizasaun Internasionál Polísia Kriminál (INTERPOL, sigla inglés)  iha fulan-Fevereiru 2023. Notifikasaun  red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.

Arnolfo Teves Jr beibeik ona la simu akuzasaun no desizaun sira judisiáriu nian hasoru nia no duni nia sai hosi Parlamentu tanba nia hahalok la disiplina no dezobediénsia.

Lee Mós: Dezde Jullu 2023, Konsellu Anti-Terrorizmu Deklara Arnolfo Teves Jr Terrorista

Jornalista: Rogério Pereira Cárceres