Hatutan.com, (26 Marsu 2024), Díli– Vise-Primeiru-Ministru no Ministru Koordenador bá Assuntu Ekonómia no Ministru Turizmu no Ambiente, Francisco Kalbuadi Lay,  Tersa (26/03/2024),  halo vizita supreza bá Servisu Verifikasaun Emprezarial, Institutu Públiku (SERVE I.P) hodi hatene besik liután servisu no atendimentu públiku iha institutusaun Estadu refere.

Lee Mós: Ezijénsia Funsionáriu Kontratadu SERVE,I.P Na’in-166, Florêncio Sanches: “Bele Lori bá Ministériu Públiku”

Vise-PM Francisco Kalbuadi Lay halo vizita surpreza bá edífisiu SERVE, I.P, Tersa (26/03/2024). Foto/Elio dos Santos da Costa

Tuir observasaun Hatutan.com iha terenu nota katak Vise-Primeiru-Ministru no Ministru Koordenador ba Assuntu Ekonomia no Ministru Turizmu no Ambiente, Francisco Kalbuadi Lay to’o iha edifísiu sentral SERVE I.P Matadoru, Díli iha  tuku 09:00 OTL no direitamente hakat bá edifísiu laran hodi kumprimenta funsionáriu sira no dadalia ho funsionáriu balun ne’ebé iha hodi husu esplikasaun detallu kona-ba lalaok servisu no atendimentu ne’ebé SERVE I.P halo liga ho atendimentu publiku ba kliente sira kada loron.

Iha vizita supreza ne’e Vise-Primeiru-Ministru no Ministru Koordenador ba Assuntu Ekonomia no Ministru Turizmu no Ambiente Francisco Kalbuadi Lay nian ne’ebé kuaze oras ida (tuku 09:00-tuku 09:50 OTL) ne’e labele hasoru Diretór Ezekutivu SERVE I.P tanba seidauk tama servisu.

Maske nune’e iha konversa ho funsionáriu sira Vise-Primeiru-Ministru no Ministru Koordenador ba Assuntu Ekonomia no Ministru Turizmu no Ambiente Francisco Kalbuadi Lay hateten sei haruka ekipa rekursu umanu hosi Ministériu Koordenadór Assuntu Ekonómiku (MCAE) atu halo avaliasaun no haree oinsa bele buka solusaun bá problema rekursu umanu ne’ebé SERVE I.P infrenta atu nune’e bele halo atendimentu servisu ida diak liu ho kualidade ba kliente sira.

Superviziora Senior SERVE I.P, Ana Zení de Corte Real hateten, SERVE I.P iha funsionáriu na’in-64 ho Diretór Ezekutivu no hosi funsionáriu 64 ne’ebé SERVE I.P iha 32 iha nasionál ka Díli no seluk ne’e iha munisípiu-12 inklui RAEOA.

“Iha kada munisípiu ami koloka ema na’in tolu, no iha Díli rasik ami koloka tuir nesesidade servisu ne’ebé presija dunik atu halo. Agora, ami iha menus rekursu liga ho servisu ne’ebé iha tamba ne’e ami hein desizaun iha Vise-Primeiru-Ministru no Ministru Koordenador ba Assuntu Ekonómiku no Ministru Turizmu no Ambiente Francisco Kalbuadi Lay para bele iha desizaun atu aumenta numeru funsionáriu nune’e ami bele halo servisu di’ak liután.” Ana Zení de Corte Real hateten bá Hatutan.com.

Nia hatutan iha funsionáriu 176 ne’ebé sofre hosi notifikasaun 076 no mós despaisu seluk ne’ebé obriga sira tenke hela iha uma no labele tama servisu ho ida ne’e ho vizita Vise-Primeiru-Ministru nian ne’e bele iha solusaun atu iha mos aumentu ba numeru funsionáriu iha SERVE I.P.

Vise PM Francisco Kalbuadi Lay halo vizita surpreza bá SERVE,I.P. Foto/Elio dos Santos da Costa

“Ohin, ami husu atu Vise-Primeiru-Ministru bele iha netik konsiderasaun bá funsionáriu 176 ne’ebé agora iha uma hodi nune’e bele ajuda netik ami nis kuadru pessoál iha ne’e hodi bele halo netik atendimentu tamba ami nia funsionáriu ituan tebes no difikulta ami nia servisu atendimentu ba kliente sira,” Nia subliña.

Superviziora senior  hateten,  mézmu menus funsionáriu, maibé atendimentu iha SERVE I.P lao normal hela tantu iha Díli no mós munisípiu.

SERVE I.P instituisionálmente iha unidade rua, ida mak Unidade rejistu komersiál no ida seluk mak ba Administrasaun no Finansas ne’ebé kobre mos aprovizionamentu no lojistika.

Jornalista: Vito Salvadór