Hatutan.com, (04 Abríl 2024), Díli-Bankada Parlamentár  CNRT defende atu eis-titular órgaun  soberanu sira, hanesan Prezidente Repúblika, Prezidente Parlamentu Nasionál, Primeiru-Ministru ho Prezidente Tribunál Rekursu iha direitu no merese bá subvensaun $180,000 kada tinan bá sira-nia atividade.

Lee Mós: Komisaun C PN ho CEPAD Preokupa Orsamentu $180,000 bá Eis-Titular sira Kada Tinan

Eis-titulár ein-funsaun Prezidente Repúblika (PR), José Ramos-Horta hasoru malu ho Primeiru Ministru (PM) Kay Rala Xanana Gusmão nu’udár mós eis-titulár ein-funsaun no eis-titulár ka eis-PM Taur Matan Ruak. Foto/Dok

Tuir lei númeru 7/2007, 25 fulan-Jullu, kona-bá Estatutu Titular Órgaun Soberanu nian  regula direitu sira titular órgaun soberanu nian, inklui devér no obrigasaun  eis-titulár órgaun soberanu nian.  

Membru bankada CNRT iha PN, Natalino dos Santos, hateten eis-titulár sira hanesan Kay Rala Xanana Gusmão, Taur Matan Ruak, Marí Alkatiri, Fransisco Guterres Lú-Olo, no mós José Ramos Horta merese hetan subvensaun $180,000 ne’ebé Governu aloká kada tinan.

Nia haktuir lei mak regula alokasaun $180,000 bá sira ne’e no atu utiliza bá atividade saida de’it depende bá eis-titular sira-ne’e. Maibé, Deputadu Natalino dos Santos, rekoñese  tenke iha mós órgaun ruma mak bele haree kona-bá halo fiskalizasaun ka sira bele hatama relatóriu bá gastu orsamentu $180,000 kada tinan.

Bá Hatutan.com iha Parlamentu Nasionál (PN), Kinta (04/04/2024), haktuir  posivel  halo alterasaun bá lei ne’e hodi halo redusaun bá subvensaun $180,000 kada tinan, maibé agora labele  atu hasai eis-titulár sira-nia direitu ne’e atu bele iha justisa sosiál.

“Ha’u hanoin ida-ne’e sai preokupasaun no ita-boot sira ko’alia took ho prezidente parlamentu Nasionál no lidér bankada sira para haree took ida-ne’e para oinsá atu redúz ka altera  Lei ne’e ,” nia hateten.

Iha parte seluk Xefe Bankada PLP, Maria Angelina Sarmento haktuir kona-bá osan ne’ebé aloká bá eis-titulár sira ne’e sira nia direitu ne’ebé atirbui liuhosi lei pensaun vitalisia eis-titulár  orgaun soberanu.

“Agora kona-bá alokasaun bá $180,000 ne’e to’o agora la simu relatóriu bá nia ezekusaun tanba ida-ne’e hanesan subsídiu ida atu sira kontinua sira nia knaar hanesan eis-titulár sira atu fó kontinuadade bá programa sira ne’ebé mak uluk sira hanesan Prezidente Repúblika, Primeiru Ministru, Prezidente Parlamentu Nasionál ho Prezidente Tribunál Rekursu,” Deputada Maria Angelina Sarmento.

Hosi nia haree  katak $180,000 ne’e balu karik  selu dobru (double pay)   haree Prezidente Repúblika José Ramos-Horta uluk eis Prezidente Repúblika agora nia asume fali knaar hanesan Prezidente Repúblika.

“Entaun ida-ne’e mak ami preokupa tanba enkuantu nia hanesan ein-funsaun hela tuir loloos subsídiu ida $180,000  ne’e labele aloká bá tanba agora nia ein-funsaun hela atuál Prezidente Repúblika, hanesan mós Primeiru Ministru Atuál,” Deputada Maria Angelina Sarmento hateten.

Nia espliká katak uluk halo lei pensaun vitalisia ne’e ho hanoin ida katak atu rekoñese no valoriza  funu na’in sira veteranu sira depois mandatu hanesan polítiku hotu ona sira labele bá kompete ho sidadaun sira seluk hodi buka servisu. Entaun, pensaun vitalisia ida-ne’e ajuda sira hodi reintegra bá sosiedade no hala’o sira nian moris hanesan baibain.

Relasiona ho relatóriu  tanba direitu ida atribui iha Lei entaun defende bá individu ne’ebé sai hanesan benefísiariu aprovisaun bá osan subsídiu pensaun ida-ne’e atu halo relatóriu, maibé  hanoin katak la ezije ema refere tenke aprezenta relatóriu.

“Hanoin osan ne’e sufisiente tanba eis-titulár ida presiza iha edifisiu ida iha empregadu na’in hira konforme nia depois mós bá viajen hanesan bá munisípiu no estranjeiru no direitu transporte,  entaun alokasaun ida-ne’e fasilita sira no seluk tán. Tuir ha’u nian haree atribuisaun subsídiu ida-ne’e mak durante ne’e eis-titulár sira balu fó bolsu Estudu no loke sira nia  fundasaun bá sidadaun Timoroan sira,” nia esplika.

Eis-titulár Vicente Guterres Lá Fó Komentáriu

 Eis Prezidente Parlamentu Nasionál ka eis-titulár, Vicente Guterres ne’ebé Hatutan.com bá hasoru iha nia servisu fatin iha resintu Parlamentu Nasionál (PN), Kinta (04/04/2024), rejeita atu halo entrevista ho jornalista la ho razaun.

Liuhosi nia pontu vokál ka sekretaria, Vicente Guterres, husu atu hatutan hela bá mídia katak nia seidauk bele fó entrevista kona-bá asuntu pensaun $180,000 kada tinan bá eis-titulár órgaun soberanu sira.

 Jornalista Estajiária: Zita Menezes/ Leopoldina De Carvalho