Hatutan.com, (09 Abríl 2024), Díli— Governu liu hosi sorumutu Konsellu Ministru (KM) ne’ebé hala’o iha Tersa (09/04/2024) aprova Proposta Projetu Rezolusaun bá Parlamentu Nasionál (PN) ne’ebé aprezenta hosi Vise-Primeiru-Ministru, Ministru Koordenadór Asuntu Ekonómiku (MKAE) no Ministru Turizmu no Ambiente (MTA) Francisco Kalbuadi Lay, kona-bá ratifikasaun Protokolu Adezaun ba Organizasaun Mundiál Komérsiu (OMK).

Reuniaun Konsellu Ministru. Foto/Tome da Silva.

Governu Timor-Leste, liu hosi Vise-Primeiru-Ministru, Francisco Kalbuadi Lay, iha loron 26 fulan-fevereiru asina ona protokolu adezaun bá OMK ho Diretora-Jerál hosi organizasaun ida-ne’e nian, Ngozi Okonjo-Iweala, durante konferénsia ministeriál OMK nian ba da-13, ne’ebé hala’o iha Abu Dhabi, Emiradus Árabes Unidus.

Lee Mós: TL Ofisialmente Sai Membru Plenu iha OMK

Adezaun bá OMK ne’e hanesan pasu krusiál ida hodi promove reforma ekonómika iha Timor-Leste no marka avansu signifikativu ida iha liberalizasaun komérsiu, insersaun iha ekonomia globál no fasilitasaun hodi asesu bá merkadu internasionál.

Proposta rezolusaun ne’e depois aprova iha Konsellu Ministru sei submete kedan bá Parlamentu Nasionál hodi hetan apresiasaun no aprovasaun tuir Lei.

“Sei bá Parlamentu, Parlamentu sei haruka komisaun espesializada sira halo relatóriu hanesan bai-bain, depois sei halo aprovasaun iha plenária bá ratifika protokolu ida-ne’e,” Francisco Kalbuadi Lay hateten hafoin Reuniaun Konsellu Ministru.

Tuir konsentrasaun ne’ebé halo entre Vise-Primeiru-Ministru, Ministru Koordenadór Asuntu Ekonómiku (MKAE), Ministru Turizmu no Ambiente (MTA), Francisco Kalbuadi Lay, konsertasaun ho Parlamentu Nasionál no entidade sira seluk, tanba eventu ne’e importante hodi bele moderniza atividade ekonómika liuliu akordu ho padraun OMK nian.

Tanba ne’e, nia dehan, preparasaun bá ratifikasaun iha PN bele halo iha momentu istóriku iha komemorasaun loron 20 de Maiu tinan ne’e.

Lee Mós: PN Husu Governu Submete Ratifikasaun Tratadu Adezaun TL bá OMK

Jornalista: Leopoldina de Carvalho