Hatutan.com, (09 Abríl 2024), Díli—Autoridade Munisípiu Díli prepara daudaun rekursu hodi halo supervizaun no monitorizasaun bá regra soe fo’er hosi kedas aldeia to’o bairru sira iha Dili laran.

Lee Mós: Timoroan Barak Seidauk iha Konsiénsia Soe Lixu iha Lixeira

Ekipamentu lixeira ne’ebé perpara atu instala iha bairu sira atu fasilita komunidade soe foer. Foto/Tome da Silva

Rekursu supervizaun ne’e sei tuun ba aldeia no bairru sira iha kapitál Díli hodi foti medida bá abitante sira ne’ebé soe fo’er la tuir  oráriu sira ne’ebé mak regula iha Dekretu-Lei 38/2008 kona-bá Ijiene no Orden Publika.   

Iha Dekretu-Lei ne’e iha artigu 9 ko’alia kona-bá koima bá ema sira ne’ebé soe fo’er arbiru ka infratór sira hosi $5,00 to’o $500.  

Iha Dekretu-Lei ne’e mós regula oráriu soe fo’er no ra’ut fo’er hosi Segunda to’o Sábadu, hosi ekipa Saneamentu Díli. Nune’e, hale’u tuku 16:00 to’o tuku 19:00 Otl, tempu bá komunidade sira so’e fo’er no hosi tuku 06.00-tuku 07:00 Otl, ekipa Saneamentu  ra’ut fo’er.  

Xefe Departamentu Saneamentu Munisípiu Díli, Domingos dos Santos Soriano, informa, daudaun ne’e servisu saneamentu Díli sei prepara rekursu hodi bele halo monitorizasaun no supervizaun iha bairu-bairu atu prevene komunidade so’e fo’er arbiru.

“Agora ema ami tau iha terrenu ne’e la’ós atu kaer ema ka infratór sira, maibé hanesan kontrola atu labele so’e fo’er arbiru. Ezemplu, ami tau ona iha kruzamentu besik loja 88 nian, pesoál na’in-rua, hodi bele kontrola  bainhira iha loron lixu ra’ut ona, ema labele soe tan,” Domingos Soriano informa hodi responde Hatutan.com iha knar fatin, Segunda (08/04/2024).  

Daudaun ne’e Governu liuhosi Prezidente Autoridade Munisípiu  Díli (PAM) kontrata pesoál apoiu limpeza bá área saneamentu hamutuk  na’in-80, aumenta tan karreta 50 hodi apoiu karreta atuál hamutuk 100 ne’ebé iha loron 01 fulan-Abríl, semana kotuk, halo ona lansamentu iha Tasi-tolu hodi apoiu servisu saneamentu hamoos lixu iha kapitál Dili.

Daudaun ne’e limpeza rekolla lixu hahú Segunda to’o Domingu no PAM Díli esforsu hela orienta karreta hirak ne’e halo movimentu regular rekolla lixu hosi Díli bá iha lixeiru Tibar.

Ekipamentu lixeira ne’ebé perpara atu instala iha bairu sira atu fasilita komunidade soe foer. Foto/Tome da Silva

Dau-daun ne’e kompañia 5 mak halo kontratu ho Servisu Saneamentu Munisípiu Dili hodi rekolla lixu iha Díli laran, ho total karreta rekolla lixu husi kompañia 5 ne’e 100 ho nia portofoliu servisu raut lixu mak hanesan;

Bá postu administrativu Dom Aleixo ne’e responsavel husi  kompañia G.S.A ho total karreta ra’ut foer ka lixu hamutuk 26 área Lot A.

Kompañia Nelce responsavel iha Postu Admistrativu Dom Aleixo área Lot B ho karreta 23,  Postu Administrativu Vera Krús ho karreta 16 responsavel hosi kompañia Filipra, Postu Adiminsitrativu Nain Feto responsavel hosi kompañia Zakliro ho total karreta ra’ut lixu  20, Postu Cristo Rei responsavel hosi kompañia Labilai ho karreta hamutuk 15, nia rekolla to’o iha área besik empreza Heineken.

Tuir dadus kada loron karreta ida (1) bele rekolla lixu to’o ret tolu (3) ka tuir estimasaun bele tonelada ret bele to’o tonelada rua (2) ka  tolu (3).

Karreta lixeiru. Foto/Tome da Silva

Ekipa kontinua halo monitorizasaun ba kompañia sira atu servisu tuir rekezitus katak distansia metro 10 husi fatin lixu ba area parte karuk no loos tenki limpeza moos, bainhira identifika lixu sei barak, parte relevante sei fo karta xamada atensaun ba kompañia, monitoriza mos ba ekipamentus no rekursu ne’ebe iha.

Liga ho Ekipamentu Pezadu Operasaun Projetu Resido Solidu (RSU) iha Edifísiu Munisípiu Díli no Administrasaun Estatál ne’ebé  fornese husi kompañia internasionál China Nuklir seidauk bele halo lansamentu  tanba sei prepara kondisaun.

Tuir informasaun katak, Munisípiu Díli mak sei hala’o jestaun no sei implementa hosi empreza internasionál China Harbour kooperasaun ho empreza nasionál.

Ekipamentu pezadu hirak ne’e hanesan ekipamentu modernu hodi rekolla lixu ho teknolojia ne’ebé kompleta kedan ho nia lixeiru idak-idak.

Jornalista: Leopoldina de Carvalho