Hatutan.com, (10 Abríl 2024), Díli–Komunidade  Musulmanu iha Timor-Leste, Kuarta (10/04/2024),  selebra loron Eid al-Fitr (Idul Fitri) 1445 H/2024 M.

Lee Mós: Selebrasaun Loron Idul Fitri Hanesan Vitória Bá Komunidade Muslumana

Komunidade Musulmanu iha Timor-Leste selebra loron Eid al-Fitr (Idul Fitri) 1445 H iha Masjid An’nur, Díli, Kuarta (10/03/2024). Foto/Elio dos Santos da Costa

Prezidente Konsellu kurador Fundasaun Masjid An’nur, Díli,  H. Abdullah Said Sagran hateten loron  ne’e nu’udár loron  Idul Fitri fulan syawal dahuluk (1 syawal), hanesan mós tempu bá  komunidade Izlamika hodi selebra vitória tanba halao ona jejun durante fulan-ida (1).

“Ne’e hanesan ita tama iha kampu batalla ida, la’ós funu hasoru inimigu, maibe funu hasoru ita-nia an rasik, atu nune’e, hasa’e ita-nia kapasidade fé, takwa no ohin loron sai hanesan vitória ida,” H. Abdullah Said Sagran esplika bá jornalista sira iha Masjid An’nur, Kampo Alor, Díli.

Festa Idul Fitri ka Eid al-Fitr ne’e komunidade Musulmanu sira konsidera hanesan loron ida komemora  vitória ne’ebé  durante ne’e komunidade funu ka luta durante fulan-ida ( 1) hanesan halo Jejun.

Tuir prezidente fundasaun ne’e esplika hanesan komunidade Musulmanu iha Timor-Leste ne’ebé minoria kontenti no haksolok tanba la hetan diskriminasaun hosi komunidade relijiaun seluk.

“Ita haree  komunidade musulmanu iha teritóriu nasionál mós halao moris hamutuk ho komunidade relijiaun seluk la’o ho di’ak , amizade, armonia no laiha diferensia buat ida, laiha konflitu relijioju. Ida-ne’e ita konsidera hanesan vitória ida ne’ebe di’ak ne’ebe mak ita timoroan alkansa no sai lisaun boot bá mundu,”  nia hateten.

Iha selebrasaun Idul Fitri ne’e mak tenke  iha mudansa iha ida-idak nia an rasik, iha ida-idak ita nia fé (takwa )signifika katak hamta’uk de’it Nai Maromak no besik bá Nai Maromak.

“Enkuantu ita tauk bá Nai Maromak ita tauk bá Nia kastigu bá buat sira ne’ebe ita halo bá mundu ne’e no aban bairua ita sei hasoru loron julgamentu no sei tama iha infernu, ida ne’e  mak ita dehan tenke hamta’uk  no ita tenke prepara an ho fé metin,” H. Abdullah Said Sagran afirma.

Komunidade Musulmanu iha Timor-Leste selebra loron Eid al-Fitr (Idul Fitri) 1445 H iha Masjid An’nur, Díli, Kuarta (10/03/2024). Foto/Elio dos Santos da Costa

Iha biban ne’e, Prokuradór Jerál Repúblika  (PGR, sigla portugés) Alfonso Lopez mós hato’o nia sentimementu hanesan  ema Musulmanu ne’ebe selebra loron Idul Fitri ne’e hateten, nu’udár pesoál hato’o boas festas Idul Fitri, Eid Mubarak, hanesan fiar musulmanu nian bá ema ne’ebé selebra lorin ne’e, tantu iha rai laran no rai liur.

“Ne’e nu’udar fulan-ida ita hotu halo sakrifisiu jejun bá hahalok at sira hotu, atu ikus ita bele sai ema dia’k,ho nune’e senti haksolok, hanesan nasaun ida demoktátiku nakonu ho toleransia, ne’e sai sinal pizitivu bá iha rai-laran no mundu,” Alfonso Lopez hateten.

Nia haktuir katak  bele iha diferensia oin-oin entre povu Timor Leste rasik, hanesan balun fira tuir adat, iha lisan oin-oin, iha uma lulik, balun fiar relijiaun oioin, maibé Timoroan hotu hamutuk ho objetivu ida deit mak lori nasaun ida-ne’e bá dezenvolvimentu, ne’ebe ikus liu mak bá povu nia moris diak.

Observasaun Hatutan.com iha resintu Masjid An’nur  nota katak komemorasaun loron Eid  al-Fitr 1445 H/ 2024 M komunidade musulmanu sira hahú ho reza ( shollat) hamutuk iha tuku 07:00 dader no remata tuku 08:00 Otl.

Jornalista: Leopoldina de Carvalho