Hatutan.com, (11 Abríl 2024), Díli—Governu liu hosi Ministériu Komérsiu Indústria (MKI) servisu hamutuk ho Banku Mundiál iha Timor-Leste (TL), lansa porta informasaun komérsiu hodi apoia atividade komersiál iha nasaun ne’e.

Governu liu hosi Ministériu Komérsiu Indústria (MKI) servisu hamutuk ho Banku Mundiál iha Timor-Leste (TL), lansa porta informasaun komérsiu hodi apoia atividade komersiál iha nasaun ne’e, Kinta (11/04/2024).

Ministru Komérsiu Indústria, Filipus Nino Pereira hateten, Governu Timor-Leste liu hosi MKI ho orgullu boot bele lansa ona plataforma Portál Informasaun Komersiál ka Timor-Leste Trade Information Portal.

Lee Mós: Governu Sei Lansa Portal Informasaun Komersiál

“Portál informasaun komersiál ida ne’e sei fasilita komunidade emprezariál sira ferramenta importante iha komérsiu atu bele buka informasaun relevante sira kona-bá prossesu importasaun iha espesífiku. Ita espera Trade Information Portal (TIP) ne’e bele rezolve informasaun kona-bá aktividade komérsiu ne’ebé dala barak empreza sira hasoru, halais prossesu importasaun no esportasaun no simplifika prossesu,” Filipus Nino Pereira hateten iha diskursu lansamentu portál ne’e, Kinta (11/04/2024).

Ministru ne’e dehan, antes to’o iha faze lansamentu ne’e, prossesu estabelesimentu ne’e liu hosi métodu ida rigorozu tebes inklui peskiza, konsulta, avaliasaun no validasaun ho parte pertinente sira, seitór privadu hanesan Camara Comércio Indústria Timor Leste (CCITL), asosiasaun emprezariál sira iha komoditi espesifiku, ajénsia portuária sira, customs broker, importador no esportadór sira.

Portal informasaun komérsial ida ne’e hanesan Timor-Leste nia objetivu estratéjiku atu bele entegra iha merkadu rejionál, globál no sira seluk tan iha futuru.

Portal ne’e mós atu korresponde Roadmap ASEAN nian, liuliu atu bele assegura katak iha transparénsia ba informasaun no repozitoriu importante ida relativa ho komérsiu.

Portal ne’e atu bele atrai investimentu tanba rejime ida ne’ebé transparente no kredivel ho maneira publikasaun ida ne’ebé kredivel ba informasaun komérsiu nian, sai hanesan valór ida ba Timor- Leste nia ekosistema ekonómika.

Reprezentante Banku Mundial iha Timor Leste, Bernard Hanrbone kongratula ministru komérsiu indústria Filipus Nino Pereira ho ekipa tomak bá lansamentu Portal informasaun komérsial ne’e.

Nia konsidera Portal ne’e importante nu’udar rekezitus ida bá Timor Leste nia adezaun ba Organizasaun Mundiak Komérsiu (OMK) no ASEAN no lori mos vantajen mai povu Timor Leste rasik ne’ebé mak hakarak halo esportasaun no importasaun.

Prezidente CCI-TL, Jorge Manuel de Araújo Serrano reprezenta emprezáriu sira hotu iha Timor Leste rekoñese katak, portál informasaun komérsiu ne’e importante tebes ba emprezáriu sira hodi bele halo negósiu.

Jornalista: Leopoldina de Carvalho