Hatutan.com, (19 Abríl 2024), Díli – Konfederasaun Sindikatu Timor-Leste (KSTL) organiza asaun pasifika  da-uluk iha Díli  hodi  ezije Governu hasa’e saláriu mínimu  $115 bá  $150.

Lee Mós: 2024, Governu Hasa’e Saláriu Mínimu Hosi $115 bá $150

KSTL organiza asaun pasífiku ejize Hovernu hasa’e saláriu minímu $115 bá $150. Foto/Tome da Silva

KSTL propoin ona proposta lei hasa’e saláriu mínimu traballadór sira nian hosi $115 bá $150 kada fulan, maibé  Governu liuhosi reuniaun Konsellu Ministru seidauk foti desizaun hodi  maintain saláriu mínimu traballadór sira-nian $115 kada fulan.

Proposta dekretu lei ne’e bazeia bá konsellu nasionál traballu nian ne’ebé kompostu tripartida mai hosi Governu reprezenta hosi SEFOPE, no mai hosi empregadór sira reprezenta hosi Kamara Komérsiu no Indústria Timor Leste (CCI-TL) no mós hosi parte traballadór sira ne’ebé reprezenta hosi KSTL.

Tuir konviksaun KSTL nian katak Governu presiza rona hodi tetu no importante liu konsulta ho SEFOPE hodi tetu saláriu mínimu  $150 to’o $164 ne’ebé hatudu  rezultadu hosi peskiza.  

“Asaun ne’ebé mak ohin ami  halo bá oin sei  kontinua to’o hetan rezultadu bá saláriu mínimu iha Timor-Leste. Ba oin, ami fó ami nia enerjia no gastu ita-nia tempu makas to’o hetan rezultadu,” prezidente KSTL Almerio Vilanova hateten bá jornalista sira iha ámbitu asaun pasifika da-uluk ne’ebé hala’o iha sede Dili, Sesta (19/04/2024).

Prezidente KSTL hateten tuir regra bainhira  kada tinan-rua  saláriu mínimu sa’e ona. Nune’e, bainhira kalkula hosi 2014 to’o 2024 bele sa’e dala-neen (6) ona ne’ebé Governu labele taka-matan bá ida-ne’e.

KSTL husu atu Konsellu Ministru atu iha tempu badak nia laran  halo revizaun bá saláriu mínimu $115 sa’e bá $150 menus Governu aprova tiha ida-ne’e depois mak halo fali peskiza foun bazeia bá situasaun real. Ezemplu Governu hakarak ida $150 sa’e bá  $200 ne’e bele halo peskiza foun fali maibé atu rezolve uluk de’it $115 sa’e ba $150 mós todan tiha oan, ne’e labele.

Iha loron 1 fulan-Maiu ne’e nu’udár loron nasionál bá traballadór sira, tanba ne’e, mak KSTL sei organiza  marxa ka la’o ain hale’u Díli laran hodi ko’alia nafatin bá saláriu mínimu.

Iha fatin hanesan traballadór Lusinda da Costa hateten hanesan traballadóra ida bainhira nia saláriu kada fulan ho montante $115 ne’e atu gastu bá uma laran no sustenta  oan sira bá eskola mós difisil tebes.

“Ha’u servisu tinan barak ona iha empreza  ida komesa iha 1989  to’o ohin loron, agora Ha’u ferik tiha ona ha’u nia saláriu bele konta di’ak uitoan tanba servisu tinan barak ona ha’u simu $200 ba leten, maibé bá kolega sira seluk sira servisu kuaze tinan 5 to’o 6 kada fulan sira simu saláriu $130. Ne’ebé ita simu $115 ne’e atu sustenta de’it bá ita nia an rasik mas ita Timor ne’e hatene malu hela  família ida ne’ebé mak dezempregu hela ne’e hotu-hotu hateke bá ida ne’ebé mak kaer servisu entaun sira hobur bá nia de’it,” nia konta tuir.

Tuir nia, Governu tenke  hatene katak traballadór sira hotu-hotu  saláriu mínimu hosi $115 bá $150.

Jornalista Estajiáriu :  Lazaro Pereira Quefi