Hatutan.com, (22 Abríl 2024), Díli—Prezidente Repúblika (PR), José Ramos-Horta hamutuk ho delegasaun semo bá Portugál hodi partisipa aniversáriu Revolução dos Cravos bá dala-L (50).

Aeroportu Internasionál Prezidente Nocolau dos Reis Lobato, Díli, Timor-Leste. Foto/Rogério Pereira Cárceres.

Ramos-Horta sei to’o iha Portugál iha loron 23 fulan-abríl no sei hela iha ne’ebá to’o loron 30 fulan-abril hodi partisipa iha serimónia importante aniversáriu Revolução dos Cravos.

Lee Mós: Ramos-Horta Partilla ho EUA Kona-bá Konflitu iha Myanmar

Iha Portugál, Xefe Estadu sei hasoru-malu ho nia omólogu Prezidente Portugál Marcelo Nuno Duarte Rebelo de Sousa , Primeiru-Ministru, Luís Filipe Montenegro Cardoso de Morais Esteves  no Prezidente Asembleia Nasionál Portugál José Pedro Aguiar-Branco.

Revolução dos Cravos akontese iha loron 25 fulan-abríl, hamanu  salarizmu no hahú implementa rejime demokrátiku ida iha nasaun Portugál.

Grupu ne’e lidera hosi grupu bo’ot ida-ne’ebé kompostu hosi ema sivíl, dadur sira, polítiku sira, artista sira, intelektuál sira, profisionál sira hosi Estadu diktatoriál rasik no la hanesan ho revolusaun barak, pessoál militár sira.

“Konseitu revolusaun ne’e baibain kompriende hanesan transformasaun radikál ida bá estrutura polítika, sosiál, ekonómika, kulturál ka teknolojia ruma, katak buat hotu-hotu ne’ebé iha relasaun ho ema nia moris. Konseitu ida-ne’e fundamentál tebes atu komprende períodu istóriku modernu no kontemporáriu,” Hatutan.com sita komunikadu.

Sei Simu Doutor Honoris Causa

Hafoin partisipasaun iha aniversáriu Revolução dos Cravos iha Portugál, Xefe Estadu sei kontinua viazen bá Estadus Unidus Amérika (EUA) no sei hato’o dikursu formatura iha Universidade Rutgers.

Iha diskursu ne’e Xefe Estadu sei ko’alia kona-bá Lisaun Funu no Pás husi suku ida iha Sudeste Áziatiku.

“Prezidente José Ramos-Horta sei simu mos “Doutor Honoris Causa” husi Universidade Rutgers.” Komunikadu hateten.

Prezidente Repúblika sei fila-hikas hosi Estadus Unidus Amérika mai Timor-Leste iha loron 01 fulan-maiu no to’o iha Díli iha loron 3 fulan-maiu 2024.

Jornalista: Vito Salvadór