Hatutan.com, (26 Abril 2024), Díli- Prezidente Pelican Paradise Group, Datuk Edward Org, Sesta (26/04/2024), iha Palásiu Governu,  hasoru malu ho Primeiru-Ministru Kay Rala Xanana Gusmão, hodi fundamenta komunikasaun no koordenasaun iha prosesu investimentu otél fitun lima ne’ebé sei harii iha área Tasi-tolu, Díli.

Lee Mós: Ramos-Horta Husu Empreza Involve Timoroan Iha Projetu Pelican Paradise, Alkatiri Sujere Aselera

Serimónia lansamentu projetu Investimentu Pelican Paradise iha Tasi tolu, Díli, Sesta 25 fulan-Novembru 2022. Foto/Dok. Média PR.

Prezidente Pelican Paradise Group, Datuk Edward Org, hateten hasoru malu ho Primeiru-Ministru Xanana Gusmão atu up-date kona-bá projetu Pelican Paradise tanba projetu boot tenke iha koordenasaun no kooperasaun di’ak entre investidór ho governu.

“Ami nia dezeñu detallu hotu loos ona, no konsulta ona ho parte Governu atu oinsá mak projetu ne’e bele hahú, no hahú haree prioridade sira liu-atu garante projetu ne’e bele la’o bá oin,” Datuk Edward Org  informa bá jornalista sira.

Nia hatutan terrenu ne’ebé iha parte empreza konstrutór halo ona aterru no sei presiza tan tempu fulan-36 atu halo koneksaun bá eletrisidade no bee-moos, hodi garante implementasaun projetu ne’e.

Iha  Segunda, 03 fulan-Abríl 2024,  Prezidente Pelican Paradise Group, Datuk Edward Org informa ona ba Prezidente Repúblika (PR), José Ramos-Horta katak, iha fulan-Abríl nia laran hahú projetu konstrusaun Otél Fitun Lima iha área Tasi-tolu ho totál orsamentu  bá faze dahuluk nian hamutuk billaun $1-resin.

Depois de halo lansamentu bá projetu ne’e iha loron 25 fulan-Novembru 2022,  Pelican Paradise halo servisu barak, primeiru halo konkluzaun bá prosesu tenderizasaun iha fulan-Fevereiru, antesipa mós iha terrenu nune’e iha fulan-Abríl nia laran bele komesa halo servisu.

Jornalista: Vito Salvadór