Hatutan.com, (29 Abríl 2024), Díli-Sekretáriadu Tékniku bá Administrasaun Eleitóral (STAE),  Sábadu (27/04/2024), organiza no realiza eleisaun  órgaun suku 2024 bá suku foun hamutuk 10 iha territóriu nasional. Hosi rezultadu eleisaun órgaun suku ne’e, hatudu suku-lima mak tenke hakat bá eleisaun segunda volta iha loron 13 fulan-Maiu, tinan ne’e, tanba la atinje barreira 50%+1 nositasaun ne’e akontese tanba mós taxa partisipasaun eleitór sira ne’ebé menus ka atinje de’it 47% .

Lee Mós: Eleisaun Órgaun Suku iha Madohi ho Bebonuk Hakat Bá Segunda Volta

Eleisaun Órgaun Suku, Sábadu (27/04/2024). Foto/Leopoldina de Carvalho

Eleisaun  bá órgaun suku 2024 ne’e, fó fila opsaun bá komunidade sira atu hili sira-nia estrutura órgaun suku foun, ho nia kompozisaun xefe aldeia, xefe suku ho delegadu suku, tanba hirak ne’ebé asume durante tinan-lima (5) bá kotuk kompleta ona sira-nia mandatu.

Diretór Jerál STAE, Elviro Fernandes Moniz, informa suku-lima ne’ebé nia rezultadu hadudu xefe suku sira-manan imediatu no hetan votu mairoa absoluta ka liu bareira 50%+1 mak hanesan Suku Sicone-Dilole, lokaliza Postu Administrativu Barique/Natarbora, ho Suku Laicore, iha Postu Administrativu Laclo, Munisipiu Manatuto, Suku Mantelolão, iha Postu Administrativu Metinaro, Suku Ai-lok, lokaliza iha Postu Administrativu Cristo Rei, Munisípiu Díli ho Suku Bocolelo, Postu Administrativu  Aleiu, Munisípiu Aileu.

Iha suku-lima seluk ne’ebé hakat bá eleisaun segunda ronda mak hanesan, Suku Bebonuc, Suku Madohi, no Suku Manleuana, iha Postu Administrativu Dom Aleixo, Munisípiu Díli, Suku Builo, Postu Administrativu Ossú, Munisípiu Viqueque, Suku Lequitura, iha Postu Adminsitrativu Aileu, Munisípiu Aileu.

“Rezultadu xefe aldeia, delegadu, delegada, eleitu hotu ona. Bá pozisaun xefe suku maka  iha suku sanulu ne’e, lima maka eleitu. Agora, suku lima ne’ebé maka avansa bá segunda ronde ne’ebé sei vota fali iha loron 13 fulan-Maiu mai, maka hosi Aileu nian, Suku Lequitura, iha Ossú, Suku Builo, iha Díli mak Suku  Bebonuk, Madohi no Manleuana,” Diretór Jerál STAE, Elviro Fernandes Moniz, informa bá Hatutan.com, iha kna’ar fatin STAE, Caicoli-Díli, Segunda (29/04/2024).

Dadus hosi STAE nasionál kona-bá totál eleitór suku 10 nian ne’ebé rejistadu iha sistema baze dadus, hamutuk 33,176. Totál leitór ne’ebé tuir vota 17,598 no sira ne’ebé la tuir vota hamutuk 15,578.

Iha Viqueque, eleitór sira ne’ebé bá ezerse direitu votu iha Suku Builo ho  persentajen 67, iha Manatuto, Suku Sicone-Dilole ho Laicore hamutuk 60%, iha Aileu, Suku Bocolelo ho Lequitura 83%, iha Díli, Suku Mantelolão, Ai-lok, Madohi, Bebonuk, Manleuana ho 51%.

Tuir diretór jerál STAE katak, númeru ka persentájen jerál kona-bá taxa partisipasaun eleitór sira-nian iha eleisaun suku 10 ne’e iha 47% de’it, no númeru ne’e konsidera menus tebes, tanba iha fatór barak.

Diretór jerál Elvino ne’e dehan, durante eleisaun órgaun suku bá suku 10 la akontese reklamasaun ruma kona-bá kandidatura nnian, kona-bá votu, maibé, só akontese karik mós, ne’e buat ida normál.

“Pore-zemplu, iha kandidatu balu mak sira dehan, kartaun ida ne’e la’ós ema iha suku ne’e nian, mais, formalmente, ne’e ami la simu. Agora, reklamasaun, to’o oras ida ne’e, kona-bá votu, la simu rezultadu, ida-ne’e mós ami la simu, purke reklamasaun sira-ne’e tenke akontese duni iha asembleia aldeia. Períodu ida votasaun ninian, la simu, tenke hotu iha ne’ebá. La’ós hanesan eleisaun jerál nian mak halo rekursu, no prosesa mai to’o nasionál,” nia informa.

Hatán Kona-bá Protestu Iha Bebonuk

Iha eleisaun bá órgaun suku, foin lalais, iha Suku Bebonuk, sentru votasaun Sede Aldeia 20 de Setembro, mosu mós protestu hosi komunidade ka eleitór sira ne’ebé atu bá vota. Diretór Jerál STAE esklarese katak, asaun protestu ne’e mosu, tanba to’o tarde iha sentru votasaun liu ona tuku 15:00 Otl. Tuir lei eleisaun nian katak, votasaun hahú iha tuku 09:00 dadeer, no tenke hotu iha tuku 15:00, Otl.

Xefe Suku Eleitu Konvoka Enkontru Konsellu Suku

Tuir kalendáriu hosi STAE, iha loron 08 fulan-Maiu mai ne’e, Xefe Suku eleitu sira ne’ebé mak manán iha eleisaun  órgaun suku iha Sábadu (27/04)/2024), tenke hala’o enkontru konvokatóriu ida iha sede suku, sira hanaran reuniaun konsellu suku ad-hoc ne’ebé lidera hosi xefe suku eleitu, atu forma meza, hodi hili lia-na’in, reprezentante juventude mane no feto.

 Jornalista: Rogério Pereira Cárceres