Hatutan.com, (29 Abríl 2024), Díli— Sekretáriu Estadu Komunikasaun Sosiál (SEKOMS), Expedito Loro Dias Ximenes iha esperansa katak, jornalista sira sei kontinua oferese produtu jornalístiku ne’ebé sensível bá igualdade jéneru no mós inkluzaun sosiál.
Sekretáriu Estadu Igualdade (SEI) ho Sekretáriu Estadu Komunikasaun Sosiál (SEKOMS) realiza enkontru ho komunidade média sira kona-bá oinsá jornalista sira halo notísia kona-bá asuntu feto no labarik sira ne’ebé sensível bazeia bá jéneru, iha edifísiu SEI obrigado barak Díli, Segunda (29/04/2024). Foto: Elio dos Santos da Costa.
SEKOMS espressa esperansa ne’e iha enkontru ne’ebé organiza hosi Sekretáriu Estadu Igualdade (SEI), hamutuk ho komunidade média sira kona-bá oinsá jornalista sira halo notísia kona-bá asuntu feto no labarik sira ne’ebé sensível bazeia bá jéneru, iha edifísiu SEI obrigado barak Díli, Segunda (29/04/2024).
Lee Mós: CI-UNDP Prodús Matadalan Reportájen Sensível ba Jéneru
“Ida-ne’e mak presiza atu promove, nune’e husik ona notísia ne’ebé mak halo públiku dúvida bá inan feton sira halo, tanba inan-feton sira barak mak sussesu iha área rurál. Husu jornalista sira atu sensível liu bá iha notísia igualdade jéneru ho inkluzaun sosiál,” nia hateten.
SEKOMS mós haksolok tanba iha enkontru ne’e SEI aprezenta kona-bá rezultadu avaliasaun bá produtu hosi média imprime sira ne’ebé eziste, maibé ida-ne’e seidauk másimu atu prodús notísia ne’ebé sensível bá jéneru.
“Presiza ita halo barak liu tán atu jornalista sira bele hatene di’ak liu tán oinsa halo notísia ne’ebé sensível bá jéneru,” nia hateten tán.
Iha fatin hanesan diretér jerál SEI, Armando da Costa esplika kona-bá objetivu prinsipál realiza enkontru ho média na’in sira mak hanesan:
Primeiru haree bá servisu kooperasaun entre SEI ho média sira relasiona ho publikasaun sira bá iha media nian atu asegura katak, publikasaun sira ne’e iha sensibilidade bá kestaun igualdade no inkluzaun.
Tuir fali atu bele explora servisu hamutuk ba oin atu halo oinsa mak bele realiza formasaun no treinamentu sira ne’ebé mak antes ne’e SEI halo ona ho média balun, nune’e iha hanoin atu bele Kontinua atividades sira hanesan ne’e hodi bele apoiu-malu iha publikasaun sira ho loos.
Ikus liu maka bele troka hanoin bá malu atu nune’e bele hasa’e liu tán kualidade servisu iha sensibilidade bazeia ba jéneru, tanba feto iha nível foti desizaun sai programa prioridade bá SEI.
Jornalista Estajiáriu: Lázaro Pereira Quefi