Hatutan.com, (03 Maiu 2024), Díli—Prezidente Repúblika (PR), José Ramos-Horta husu bá jornalista sira iha Timor-Leste (TL) no nível globál atu hala’o knaar ho responsabilidade ne’ebé konsidera importante tebes nu’udár guarda ambientál hodi salva planeta ida-ne’e hosi mudansa klimátika to’o lakon biodiversidade, poluisaun to’o desflorestasaun, emerjénsia ambientál fó impaktu b’a kada nasaun, komunidade no ema iha planeta ida-ne’e.

Ramos-Horta hato’o mensajen ne’e relasiona ho komemorasaun loron Mundiál Liberdade Imprensa, ne’ebé jornalista,  Asosiasaun jornalista sira no Konsellu Imprensa (KI) selebra iha Timor-Leste.

Lee Mós: Loron Mundiál Liberdade Imprensa 2024, Jornalista Timoroan “Ta’uk” no “Hili Nonook” ho Sira-Nia Susar Kona-bá Bem-Estar

Tema globál bá selebrasaun loron Mundiál Liberdade Imprensa tinan  2024 maka  “Imprensa bá Planeta ne’e hanesan apelu importante ida bá jornalizmu atu foka nia lensa ka kobertura bá degradasaun hosi natureza mundu nian”.

“Iha Loron Mundiál Liberdade Imprensa nian ida-ne’e, ha’u hato’o parabéns bá jornalista sira ne’ebé fó naroman bá ameasa urjente ida-ne’ebé hasoru umanidade – krize ambientál. Imprensa ida-ne’ebé livre no independente ne’e esensiál tebes atu hasa’e konsiénsia, dirije asaun no kaer metin líder sira no instituisaun sira ne’ebé responsável bá assuntu ambientál sira,” Hatutan.com sita komunikadu, Kinta (02/05/2024).

Konteúdu mesajen ne’e Ramos-Horta hateten, iha Timor-Leste, nasaun foin-sa’e ida-ne’e hetan ona efeitu ne’ebé aat tebes hosi mudansa klimátika inklui produsaun agríkola ne’ebé menus, inseguransa ai-han, falta bee, destruisaun infraestrutura, lakon vida no dezlokasaun umanu. Tenke proteje ambiente ne’ebé importante tebes atu sustenta ema nia moris.

“Ha’u ezije jornalista sira iha Timor-Leste no iha nivel globál atu halo sira-nia responsabilidade importante hanesan guarda bá ambientál. Jornalista sira iha papél importante atu hala’o kobertura bá krize ida-ne’e ho forma objetiva, kontinuidade, no komprensivu. Tau ó-nia lapizeira no kamera nu’udár instrumentu atu defende planeta ne’e. Liuhosi hasa’e konsiénsia hosi imprensa ne’ebé la-hetan presaun, ita bele harii vontade públiku no polítika atu halo asaun ho aten-barani,” Prezidente Repúblika José Ramos-Horta apela.

Xefe Estadu hateten, ambiente la iha lian rasik, presiza lian imprensa livre atu sai nia advogadu bá prezervasaun no restaurasaun.

Iha Loron Mundiál Liberdade Imprensa nian ida-ne’e, Xefe Estadu husu atu mai renova kompromisu bá Imprensa bá Planeta hodi fó sai lia-loos ambientál sira, fó inspirasaun bá mudansa sira, no proteje natureza iha mundu ba jerasaun sira tuir-mai.

“Ha’u-nia votus kmanek bá jornalista sira hotu ne’ebé ho aten-barani hala’o servisu importante ida-ne’e,” Ramos-Horta parabeniza.

Jornalista: Vito Salvadór