Hatutan.com, ( 07 Maiu 2024), Díli—Daudaun ne’e ai-moruk esensiál, vitál no nesesáriu iha ona (stock on hand) Institutu Nasionál Farmásia no Produtu Médiku (INFPM) 71% no ai-moruk hamutuk 29% mak stock out.

Lee Mós: Sali-Magu Hatama Tan Ai-Moruk Item 11 no Reagentes Item 118

Ai-moruk esensiál, vitál no nesesáriu iha ona (stock on hand) INFPM hamutuk 71%. Foto/Tome da Silva

Diretór ezekutivu INFPM, Brígidio de Deus, hateten iha relatóriu mensal hatudu katak stock out ai-moruk hahú husi 23% to’o 30% bá ai-moruk hanesan esensiál, vitál no nesesariu, no ikus liu iha semana hirak ne’e nia laran stock out ai-moruk esensiál, vitál no nesesáriu hamutuk 29%.

“Loloos ne’e ita koalia kona-bá stock on hand. Saida mak iha ita-nia liman, kuandu stock out 29%, signifika iha ita-nia liman ne’e 71% iha hela tuir lista ai-moruk ne’ebé iha teritóriu nasionál ne’e total ai-moruk ne’ebé ita persiza laiha ne’e 29%, iha hela ne’e 71%,” Diretór Ezekutivu INFPM Brigidio de Deus hateten bá jornalista sira iha  nia knar fatin, edifísiu  INFPM, Tersa ( 07/05/2024).

Diretór Ezekutivu INFPM  ne’e deklara katak orsamentu ne’ebe Governu deside husi Komisaun Revizaun Orsamentu Polítika (KROP) hodi aloka osan bá kompra rejentes, konsumaveiz, medikamentu hamutuk millaun $4.3 de’it kiik  liu, kompara ho tinan kotuk tinan 2023 ho total millaun $9 ho nune’e osan ne’ebe Governu aloka labele responde bá tinan-ida nune’e hodi halo fali pedidu bá orsamentu retifikativu.

“Orsamentu ne’ebe ita prepara to’o fulan-Jullu, uza orsamentu bo’ot ida mak hermodialisa  ka fase-ran iha HNGV ne’ebe kada tinan gasta millaun $1.1 bá reajente, konsumaveis bá fase-ran nian. Nune’e to’o fulan-Jullu ne’e sei  gasta $500.000-liu sosa deit ai-moruk ho reajentes bá fase-raan. Se nune’e, kompara ho osan ne’ebe aloka bá INFPM ho montante millaun 4.3 tuir estimasaun sei labele kobre to’o tinan nia rohan,”  Brígidio de Deus hateten.

Orsamentu bo’ot mós aloka bá sosa oxijeniu, ne’ebé kada tinan ho montante $700.000. Nune’e,  nia fó ezemplu  kada loron HNGV uja 100 selindros oxijeniu, no kada selindro ho kustu $100, ne’e la inklui oxijeniu ba iha óspital referál sira, signifika gastu ne’e maka’as, ho nune’e INFPM deklara katak bainhira Governu la aumenta orsamentu mak sei implika bá servisu idak-idak.

Liga ho stock out ai-moruk iha sentru saúde sira,  Brígidio de Deus,  hateten INFPM rekoñese iha item balun laiha duni, maibe la signifika laiha hotu, nune’ INFPM halo hela konkursu públiku hodi sosa ai-moruk.

Ai-moruk 71% stock on hand iha INFPM. Foto/Tome da Silva

Daudaun ne’e, INFPM loke ona konkursu públiku bá ai-moruk item 198 ne’ebe iha ona dadus katak sei tama tan item 80 to’o fulan-Jullu 2024, balun konsege tama ona, iha  Segunda kalan (06/05/2024),  no iha loron 10 sei tama kompletu bá tubu hasai ran nia, iha modelu rua mak hanesan EDTA no ASST.

Iha item barak mak tama ona desde loron 29  fulan-Abríl, no sei iha etapa tuir mai mais ou menus sei iha item 10, no etapa tuir mai mak iha loron n 22 fulan-Maiu ne’e, sei iha item 4, no iha  fulan-Juñu to’o fulan-Jullu 2024 sei kompleta item 80, ne’e uja orsamentu jerál estadu 2024 hodi halo kompras normal tuir regras normal bá item 199.

Husi kompañia Sali-Magu,  Brígidio de Deus informa, iha  loron 8 fulan-Marsu liubá, kompañia  submete ona karta bá INFPM katak sira fó ona total item 531 no dau-daun ne’e  Sali-Magu  prontu ona atu fornese tan produtu balun bá INFPM.

Produtu ne’ebe mak INFPM simu ona husi kompañia Sali-Magu hahu husi fulan-Dezembru 2023 to ‘o agora hamutuk item 300-liu no ho total ne’ebe dau-daun ne’e prontu ona atu distribui mai INFPM hodi kompleta item 531.

Husi total item 300 ne’ebe Sali-Magu distribui ona mak hanesan ai-moruk, reajentes no konsumaveis. Ho nune’e,  INFPM konsidera katak ho problema ai-moruk ne’ebe sidauk bele responde bá nesesidade INFPM kontinua buka meiu oin-oin hodi bele loke retenderizasaun ka kontratu normal ho Orsamentu Jerál Estadu 2024 hodi loke konkursu normal bá item hirak ne’ebe la mensiona iha kontratu ho kompañia Sali-Magu.

Brígidio de Deus hateten, ai-moruk ne’ebé Sali-Magu distribui bele responde deit bá fulan-tolu (3). Tanba ne’e, iha fulan-Janeiru to’o fulan-Marsu 2024 iha konkursu públiku hodi bele responde bá nesesidade no fulan-Abríl to’o fulan-Juñu  responde ho ai-moruk husi Sali-Magu, nune’e ba oin kontinua sei kontinua loke konkursu tuir regras normal.

PT. MJB Farma Surabaya distribui tan ekipamentu médiku hanesan soru iha kontentór kuantidade 40 feed bá INFPM, Tersa (06/05/2024). Foto/Tome da Silva

Ai-moruk hirak ne’ebe atu sosa kompañia foin bele husu fabrika produz hafoin iha ona asina kontratu, nune’e nia durasaun tempu to’o Timor bele to’o fulan-rua  (2) ka  fulan-tolu (3).  

Nia relata mós katak INFPM iha diskusaun intensivu ho Ministériu Finansa  hodi buka solusaun tanba bazeia bá kontratu ho kompañia Sali-Mago remata iha fulan-Marsu, maibe se kompañia prontu distribui ho item 531 nune’e Governu iha dever hodi halo pagamentu bá sasan hirak ne’ebe nia fornese ona.

INFPM mós sei halo pagamentu bazeia ba lista ne’ebé Sali-Magu submete ona, se konklui ona 531 item mak sei selu millaun $4.3, maibe to’o ohin loron dadus ne’ebe iha foin mk itel 300 nune’e foin mak bele selu millaun $1.4.

INFPM sujere atu labele estende tan kompañia Sali-Magu hodi distribui ai-moruk ho razaun tanba kontratu termina ka mate ona.

Tuir informasaun husi prezidente R&I, Cristina da Costa katak iha Tersa lorokraik (06/05/2024), hale’u  tuku 15:00 Otl,  kompañia PT MJB Farma Surabaya distribui tan ekipamentu médiku hanesn soru iha kontentór  kuantidade 40 feed nune’e dau-daun ne’e ekipa R& I sei halo verifikasaun antes hand over bá armazen INFPM hodi distribui bá HNGV.

Jornalista: Leopoldina de Carvalho