Hatutan.com, (09 Maiu 2024), Díli- Banku Sentrál Timor-Leste  (BCTL-Sigla Portugés), rekolla moeda falsu Sentavu 50 besik ona $400 no autoridade kompetente sira mós kontinua halo investigasaun hodi buka tuir autór sira no oinsá bele lokaliza fatin sira bá produsaun nian.

Lee Mós: Atensaun, Moeda Falsu Sentavu 50 Sirkula Ona iha Timor

Osan moeda sentavu 50 orijinál ho falsu. Foto/Elio dos Santos da Costa

“Moeda falsu ne’ebé ke ami konsege rekolla to’o ohin, ne’e besik $400. Ne’e nia valór ne’e, mais, intermu de moeda falsu, ninia kuantidade ne’e 700 itál tanba 0,50 sentavu, ne’e kala besik 80 ona, sé karik besik $400 ona, ne’e signifika 800 kuantidade,”  Governadór BCTL, Hélder Lopez, informa bá jornalista sira, hafoin hasoru malu ho PM Xanana iha Palásiu Governu, Dili, Kinta (09/05/2024).

Relasaun ho moeda falsu sentavu 50 ne’e, Governadór BCTL mós informa ona bá Primeiru-Ministru, Xanana Gusmão, tanba osan hirak ne’e sirkula ona iha rai-laran, ho série 2023 ninian.  Nune’e, iha medida tolu ne’ebé mak BCTL sei foti mak hanesan, primeiru maka informa bá públiku kona-bá sirkulasaun osan falsu iha komunidade ninia leet. Segundu, karik komunidade hetan osan falsu, oinsá atu rekolla osan falsu ne’e, hatama liuhosi xefe suku, ka autoridade lokál, polísia ka banku sira depois mak hatama fali bá BCTL, atu osan falsu sira ne’e labele sirkula iha TL ninia ekonomia.

Medida terseiru maka, BCTL sei halo sosializasaun kona-bá oinsá atu fó koñesimentu bá sidadaun sira, atu nune’e, uainhira sosiedade sira ka populasaun hetan osan falsu karik, sira hatene, hodi halo deskrisaun osan falsu mak ne’ebé, no osan loos mak ida ne’ebé.

PM Xanana mós fó ona orientasaun bá BCTL atu halo akompañamentu ho di’ak liu, oinsá atu eduka populasaun sira hodi koñese TL ninia osan, liu-liu bá osan falsu, ka moeda sentavu 50 ne’ebé daudaun ne’e sirkula iha rai-laran.

Durante sorumutuk ho PM Xanana, hosi BCTL rasik, diskute mós kona-bá planu Governu nian ne’ebé atu estabelese banku dezenvolvimentu ida iha Timor-Leste, bá oin ne’e halo nusa, no BCTL mós partilla saida mak bele halo hodi fasilita programa Governu ida ne’e.

BCTL mós konvida PM Xanana Gusmão, atu halo abertura bá “Konsultasaun Públiku bá Elaborasaun Planu Estratéjiku Setór Finanseiru iha TL bá tinan sanulu oin mai, 2025 to’o 20235, iha Salaun Ministériu Finansas, Ai-tarak Laran, Dili.

Jornalista: Rogério Pereira Cárceres