Hatutan.com, (24 Maiu 2024), Aileu- Prezidente Repúblika (PR), José Ramos-Horta fó apoiu nesesidade báziku hanesan foos no mina inklui manta bá família vulneravel no defisiénsia iha Suku Fadabloco no Suku Açu-Mau, Postu Administrativu Remexio, Munisípiu Aileu.

Lee Mós: Ramos-Horta Promete Loke Sentru Formasaun Komputadór ho Inglés-Portugés bá Komunidade Fadabloco

Xefe Estadu fahe nesesidade báziku bá família difisensia ho vulneravel sira iha Suku Fadabloco ho Açu-Mau, Sesta (24/05/2024). Foto/Vito Salvadór

Apoiu ne’e nu’udár kompromisu Xefe Estadu nian atu bele tulun família vulneravel no defisiénsia sira inklui bele kontribui bá redús hamlaha no má-nutrisaun iha sosiedade.

“Ha’u hakarak mai iha ne’e haree imi, haree imi nia situasaun no kondisaun. Ha’u mós hakarak fahe bá imi sasán ruma ne’ebé ami lori mai. Iha foos, mina no manta. Bá família sira defisiénsia no vulneravel liu, hotu tiha bele husu nafatin, Prezidénsia Repúblika prontu apoiu imi,” José Ramos-Horta hateten bainhira fahe sasán nesesidade báziku bá família vulneravel sira iha, Suku Fadabloco, Sesta (24/05/2024).

Xefe Estadu hatutan apoiu sira ne’e atu tulun família sira ne’ebé kbiit laek hodi bele hetan ai-han sufisiente no iha nutrisaun ba sira nia saúde.

Xefe Suku Fadabloco, Lito da Costa hateten rona no hatene katak iha Prezidénsia Repúblika nian iha Gabinete ida kona-ba apoiu sosiedade sivíl no iha mós apoiu ai-han ba emá vulneravel sira tamba ne’e halo pedidu hodi husu apoiu.

Hanesan autoridade lokal preokupa ho situasaun moris komunidade nian, liu-liu bá sira ne’ebé ho vulnerabilidade tamba ne’e  husu Xefe Estadu atu apoiu hodi hakmaan todan ne’ebé komunidade sira enfrenta.

Iha fatin hanesan Asesór Gabinete Sosiedade Sivíl Prezidénsia Repúblika, Quintiliano Moniz hateten apoiu ne’e Prezidente Repúblika fó bá sira ne’ebé vulneravel dunik, la haree bá koor no rasa tamba Prezidente Repúblika mak aman ba povu iha  Timor-Leste.

“Apoiu sira ne’e ita nia Prezidente mak fó ba inan no aman sira kbiit laek ka vulneravel no maluk sira defisiénsia. Tanba ne’e sei la hili nia ne’e se, la haree bá kor tamba id- ne’e apoiu atu tulun dunik komunidade sira ne’ebé presiza,” Quintiliano Moniz hateten.

Total família defisiénsia no vulneravel iha Suku Fadabloco na’in-157 mak hetan apoiu nesesidade báziku no iha Suku Açu-Mau rasik hamutuk família uma-kain 187.

Jornalista: Vito Salvadór