Hatutan.com, (05 Juñu 2024), Díli– Parlamentu Nasionál liuhosi Komisaun A ne’ebé trata asuntu Lejizlasaun, Kuarta (05/06/2024), halo audiénsia ho Vise-Ministru  Fortalesimentu  Instituisionál, Paulo Remédios no Sekretáriu Estadu Teras no Propriédade (SETP), Jaime Xavier Lopes hodi buka alternativa bá kazu disputa rai ne’ebé kada loron nia grafiku aumenta bá bei-beik.

Lee Mós: Ministériu Justisa Sei Kontrola Pratika “Mafia” Rai Estadu

Prezidente Komisaun A-PN, Patrocínio Fernandes. Foto/Tome da Silva

“Komisaun A PN simu bei-beik keixá sira kona-bá rai nian, ne’e mak ami hakarak atu hetan informasaun husi Governu nu’udár ezekutivu hanesan mós responsavél politíka bá rai ida-ne’e em relasaun ho lei sira ne’ebé mak iha ona no oinsá lei sira ne’e nia implementasaun no intervensaun saidá mak instituisaun Estadu nian hanesan SETP no Ministériu Justisa rasik atua para atu redúz grafiku disputa rai iha territóriu nasionál,” Prezidente Komisaun A-PN, Patrocínio Fernandes bá jornalista sira hafoin audiénsia Vise-Ministru Justisa no SETP  iha PN.

Komisaun A-PN rona situasaun sira ne’e sira mós fó informasaun bá deputadu sira nian preokupasaunmak husi loron bá loron grafiku bá disputa rai ne’e aumenta sa’e bei-beik disputa horizontal mós iha entre komunidade ho komunidade no disputa vertikal mós iha entre autoridade ho komunidade.

Deputadu Patrocínio Fernandes hateten iha problema seluk kona-bá arendamentu rai estudu nian ne’ebé akontese sub-arendamentu hanesan komunidade ida okupa rai Estudu depois fó fali bá ema seluk ho valór boot, nune’e oinsá mak Estadu bele haree no tau atensaun bá situasaun sira ne’e. Depois buat ne’ebé propriédade Estadu nian tenke hatama reseita bá kofre Estadu la’ós iha fali komunidade no pessoál ida mak aproveita fali propriédade no rai Estadu.

Jornalista Estajiária : Zita Menezes