Hatutan.com( 11 Juñu 2024), Díli—Ministériu Transporte no Komunikasaun (MTK) liuhusi Diresaun Nasionál Transporte Maritima (DNTM) haruka ona karta bá Autoridade Portuáriu Timor-Leste, Institutu Públiku (APORTIL,I.P) suspende operasaun ró Berlin Nakroma bá konektividade Díli-Ataúro tanba iha problema tékniku no presiza halo manutensaun ka docking.
Lee Mós: 2024, APORTIL Utiliza $800.000 bá Manutensaun Berlin Ramelau-Nakroman
![](https://www.hatutan.com/wp-content/uploads/2024/06/Ro-Berlin-Nakroma-300x198.jpeg)
Ró Berlin Nakroma atraka hela iha Portu Díli, Tersa (11/06/2024). Foto/Tome da Silva
Atu garante abitante Ataúro sira-nia direitu viajen, parte DNTM deside ró Success substitui Belin Nakroma hodi halo operasaun hanesan baibain iha fim de semana ka iha loron Sábadu.
Prezidente Admistrasaun APORTIL, I.P, José de Oliveira Leong, Tersa (11/06/2024), informa bá Hatututan.com iha nia servisu fatin, katak iha loron 05 fulan-Juñu 2024, vogál II APORTIL Leandro de Sena ho ekipa téknika halo vizita traballu ba Estaleiru PT. Dok Pantai Lamongan hodi haree direita fasilidade bá preparasaun bá Ró Berlin Nakroma atu halo manutensaun iha estaleiru refere.
Fasilidades ne’ebé PT Dok Pantai Lamongan iha mak hanesan slip way no workshop (fasilidades apoiu) bá makina, elektrisidade, kanalizasaun pipa kompletu no seluk-seluk tan kumpre bá rekizitu sira empreza docking nian.
![](https://www.hatutan.com/wp-content/uploads/2024/06/Jose-Leong-300x214.jpeg)
Prezidente Admistrasaun APORTIL, I.P, José de Oliveira Leong. Foto/Tome da Silva
“Semana ida ami halo ona vizita bá iha galangan kapal docking haree ho matan rasik sira nia kondisaun saida deit mak iha ne’ebá bele prienxe ami bele haruka ró ba halo manutensaun iha fatin refere iha Surabaya-Indonézia, ne’ebé ami sei hein sei la fim do mes ka inísiu do mes, ró tenke bá ona halo manutensaun. Ami suspende ró Berlin Nakroma nia operasaun tanba kondisaun ami labele obriga demais tanba liga mós bá kestaun seguransa ka safety,” Prezidente Admistrasaun APORTIL, I.P, José de Oliveira Leong informa.
“Kondisaun ró 50% liu ha’u bele dehan 60% nia kondisaun la’ós ladiak, maibe hare liu ba safety ho security, hau lakohi obriga ró ne’e lao, tanba ro ne’e tula ema, i kondisaun ro ami hapara provizoriu tanba prepara atu ba doking” Nia esplika
Kona-bá kustu osan bá docking ne’e, José de Oliveira Leong sidauk hatene loloos, maibe hein iha konkursu mak foin bele hatene.
Jornalista : Leopoldina de Carvalho