Hatutan.com, (11 Juñu 2024), Díli—Parlamentu Nasionál (PN) liuhosi deklarasaun politíka bankada FRETILIN husu bá IX Governu Konstitusionál atu tau-importánsia bá seitór privadu nasionál iha Timor-Leste (TL).

Deputada bankada FRETILIN Cristina Yuri Rebelo hateten, Timor-Leste iha  ai-rin importante ida ne’ebé  define ona iha Konstituisaun RDTL, maka  seitór privadu, presiza tebes atu tau importánsia.

Lee Mós: Kongresu CCI-TL, Oscar Lima Husu Governu Nia Seriedade Promove Setór Privadu Nasionál

“Fulan 11 ona ita kontinua rona iha média Prezidente CCI-TL deklara katák Governu seidauk iha polítika klaru bá dezenvolvimentu seitór privadu. Bainhira Governu aprezenta programa durante debate OJE-2024 iha Parlamentu ida-ne’e, ita hotu rona kona-bá metas ne’ebé ambisiozu ké sei alkansa proximu tinan 5. Meta ida mak hasa’e kresimentu ekonomia la’ós minarai bá 5%,” Cristina Yuri Rebelo hateten liuhosi deklarasaun politíka iha plenária (10/06/2024).

Nia sita mós katak, haree de’it indikadór ne’ebé hanaran formasaun bruta do capital fixo (gross fixed capital formation, private sector (% GDP) ne’ebé seitór privadu nasionál halo liuhosi sira-nia investimentu rasik foin 5% hosi produtu internu brutu.

Nune’e, bankada FRETILIN hakarak hatene signifikadu no faktu konkretus inklui ezemplu kona-bá  “uma economia privada” ne’ebé sei fornese bá paíz ida-ne’e reseita fiskál boot tebes hodi sustenta OJE atu solusiona problema sosiál iha Timor-Leste.

Bankada FRETILIN nota katak, previzaun hosi ADB bá tinan 2024 hatudu kresimentu ekonomia bele to’o deit 3,4% no iha tinan 2025 bele to’o de’it 4,1%, ida-ne’e mós mai hosi aumentu iha despeza públika no konsumu, la’ós hosi seitór privadu hanesan temi iha programa ne’e.

Kona-bá ne’e, Vise-Ministru Asuntu Parlamentár, Adérito Hugo da Costa hateten, nafatin kaer bá IX Governu nia programa katak, sei halo diagnóstiku ida por ida atu haree saidá mak tenki halo bá seitór privadu.

“Primeiru respeita no konsidera sira nia dezempeñu, kontinua dezemvolve no insentiva sira atu partisipa iha obra sira Estadu nian hodi kapasita sira, fó oportunidade bá sira atu kapasita sira nia an. La’ós fó oportunidade de’it bá kompañia internasionál,” Adérito Hugo da Costa hateten.

Jornalista Estajiária: Zita Menezes