Hatutan.com, (12 Juñu 2024), Díli- Governu Reinu Unidu ka Inglaterra sei deporta trabaldaór ka imigrante Timoroan na’in-500 ne’ebé ho pasaporte RDTL viola vistu traballu Reinu Unidu nian.

Lee Mós: Xanana Husu Timor-oan iha Reinu Unidu Servisu Disiplina Atu Hadi’a Moris

Bandeire Ofisiál Reinu Unidu. Foto/Espesiál

“Iha Reinu Unidu mós ita hasoru situasaun ida ne’ebé difisil, Imi sei rona katak neineik ita-nia traballadór 500 sei fila gradualmente, no ita-nia embaixadór João Paulo Rangel mós servisu makas loos iha ne’ebá no hasoru malu ona ho autoridade sira Reinu Unidu nian no iha loron 07 fulan-Jullu, tinan ne’e, sei haruka fila uluk traballadór imigrante 500 husi Afrika no Asia inklui na’in-50  husi Timor-Leste iha faze primeirunian,” Ministru Negosiu Estranjeiru no Kooperasaun (MNEK), Bendito dos Santos Freitas haktuir ba jornalista sira iha Palásiu Prezidensiál, Kuarta (12/07/2024).

Traballadór Timoroan sira ne’ebé governu Reinu Unidu  sei deporta fila tamba sira uza de’it pasaporte Timor-Leste hodi servisu no viola regra imigrasaun iha Reinu Unidu.

Oras ne’e Embaixadór Timor-Leste iha Reinu Unidu trata hela prosesu deportasaun ba Timoroan sira ne’ebé ilegálmente halo servisu iha Reinu Unidu ho pasaporte Timor nian.

Timor-Leste nia relasaun bilaterál ho Portugál nafatin di’ak

Ministru Negósiu Estranjeiru no Kooperasaun (MNEK), Bendito dos Santos Freitas hateten ho Portugál ne’e Timor-Leste nia kooperasaun la’o dia’k loos, asuntu sira ne’ebé agora traballadór sira ba ne’e presijamente iha definisaun politika nasionál ne’e atu halo nusa maka traballadór sira sai bá ne’e tenke verifika ba atu halo saida no tenke iha avaliasaun no check ba criminal record hodi bele haree katak sidadaun ida bele ka lae sai husi territóriu nasionál.

Nia afirma Timor-Leste kontinua halo kooperasaun di’ak ho governu portugés nafatin no nafatin mós mellora di’ak liután atu nune’e kooperasaun bilaterál país rua kontinua metin.

“Imi mos hatene hela ona katak foin lalais Ministra Justisa Portugál mai iha ne’e, iha esplikasaun klaru los katak la’ós situasaun violénsia iha Fátima-Portugál mak sira muda lei ba imigrante sira, lae, maibé lei ne’e sira debate nanis tiha ona katak atu bele hodi kontrola imigrante sira,” Ministru Bendito dos Santos Freitas.

Governu Timor-Leste nafatin servisu makas hamutuk ho embaixadór Timor-Leste ba Portugál, Isabel Guterres halo ona esforsu hotu atu bele lori hikas Timoroan ida ne’ebé lakon vida durante konfrontu ne’ebé akontese Fátima-Portugál.

Despeza sira atu lori hikas Timoroan ne’ebé mate iha Portugál mai Timor-Leste Governu mak kobre hotu kedas.

Jornalista: Vito Salvadór