Hatutan.com, ( 22 Juñu 2024), Díli—IX Governu Konstitusionál liuhusi Ministeriu  Transporte no Komunikasaun  (MTK) halo ona ajudikasaun direita ba kompañia  Irmão Sandobe Unipessoal, Lda hodi halo reabilitasaun bá edifísiu estasionamentu Portu Díli ho nia orsamentu ka kustu $315,575.51.

Lee Mós: Uma ho Kakuluk Aat iha Portu Díli Sei Rehabilita iha Tempu Badak

Traballadór sira husi Irmão Sanobe hahú sobu uma-kakuluk edifísiu Estasionamentu Portu Díli nian. Foto/Leopoldina de Carvalho

Ministru Transporte no Komunikasaun Miguel Marques Manitelu  ne’ebé Hatutan.com konfirma Sábadu (22/06/2024), iha Portu Díli, esplika katak maske kontratu ne’e asina husi MTK  maibe projetu reabilitasaun ne’e uza fundus  orsamentu mai husi fundu infrestrutura ne’ebé prosesu ne’e halo iha Komisaun Nasionál  Aprovizionamentu ( CAN, sigla portugés) ne’ebé tutela bá Ministériu Planeamentu no Investimentu Estratejíku (MPIE).

Miguel Manitelu fó razaun katak projetu ne’e halo adjudikasaun direta ka single source tanba iha nia justifikasaun razoavel. Katak uma ne’e  iha sidade Dili nia fuan, ema tau iha rede sosiál  Facebook dehan rumah hantu, tanba uma ne’e nia kakuluk kuak hotu ona no aat loos ona no halo ema liu-ba mai haree lafurak no halo moe Timor, tenke reabilita lalais ho karater emerjénsia.

Kuadru avizu projetu reabilitasaun edifísiu estasionamentu Portu Dílli. Foto/Leopoldina Carvalho

Nia argumenta tan katak uma ne’e halo reabilitasaun de’it, tanba tuir planu Governu nian sei konstrui sai portu Mariña no mós Kruzeiru.

Ministru Miguel Manitelu husu ba kompañia kontraktor   hadia lalais kakuluk ne’e, antes fulan  ida ka rua taka ona, nune’e bele kontinua fali servisu  seluk hanesan nahe keramik, taka odamatan, monta janela no seluk tan.

Jornalista: Leopldina de Carvalho