Hatutan.com, (24 Juñu 2024), Díli—Ministériu Negósiu Estranjeiru no Kooperasaun (MNEK) liu-hosi kolaborasaun ho Austrália nia programa Parseria bá Prosperidade Inkluzivu (PROSIVU), organiza  workshop kona-bá “Timor-Leste nia Adezaun no Integrasaun ba Komunidade Ekonómia ASEAN – Negosiasaun Komérsiu no Investimentu” iha Otel Novo Turizmu, Dili, hahú hosi 24 to’o 28 Juñu 2024. 

Ministériu Negósiu Estranjeiru no Kooperasaun (MNEK) liu-hosi kolaborasaun ho Austrália nia programa Parseria bá Prosperidade Inkluzivu (PROSIVU), organiza workshop kona-bá “Timor-Leste nia Adezaun no Integrasaun ba Komunidade Ekonómia ASEAN – Negosiasaun Komérsiu no Investimentu” iha Otel Novo Turizmu, Dili, hahú hosi 24 to’o 28 Juñu 2024. FOTO: MNEK.

Timor-Leste ho dilijente prepara-an no kumpri hodi adere bá akordu protokolu no kuadru jurídiku sira iha  âmbitu ASEAN,  inklui Komunidade Ekonómia ASEAN nian.

Lee Mós: Konferénsia Sosiedade Sivíl ASEAN iha TL Sei Diskute Asuntu Importante Neen

Rekezitu sira ne’ebé sei kumpri mak hanesan asesu merkadu ba sasan no serbisu nian, movimentu ema no investimentu.

Hodi apoia esforsu hirak ne’e, MNEK nu’udár  ministériu koordenadór adezaun bá  ASEAN nian, hamutuk ho PROSIVU, programa hosi Austrália nian organiza ofisiais  hosi Governu no mós ministériu relevante sira, inklui pessoál negosiadór tékniku sira, tuir formasaun durante loron lima ho rigorozu kona-bá negosiasaun komérsiu no investimentu nian.

Formasaun ne’e sei eleva koñesimentu no abilidade  partisipante sira hodi  dezenvolve kalendáriu kona-bá Timor-Leste nia asesu bá merkadu ASEAN nian no mós sei ajuda hodi prepara no involve-an iha diskusaun no negosiasaun  signifikante sira haktuir hosi kalendáriu Estadu Membru  ASEAN nian.

Vise-Ministra ba Asuntu  ASEAN nian, Milena Rangel afirma  Timor-Leste totalmente iha kompromisu hodi sai membru  plenu  ASEAN no  garantia ho kapasidade sufisiente  hodi implementa kompromissu  ASEAN nian ho  sentidu hodi alkansa  objetivu  integrasaun  rejional.

“Bainhira ami inisia serbisu kona-bá kalendáriu adezaun bá merkadu nian, haktuir hosi rekerimentu mapa roteiru nian,  formasaun kona-bá negosiasaun komérsiu no investimentu ASEAN nian, ne’e sai momentu oportunu tebes hodi ajuda Governu ho kompetênsia  nesesária sira hodi  prepara kalendáriu ho susesu iha prosesu  negosiasaun bá ASEAN,” Hatutan.com sita deklarasaun Milena Rangel iha komunikadu.

Iha okaziaun hanesan,  adjunta Xefe Missaun Embaxada Austrália iha Timor-Leste subliña, parte importante hosi adezaun bá ASEAN mak negosiasaun, asina no implementa intrumentu legais importantes sira, hodi hetan rezultadu ne’ebe di’ak liu iha komérsiu no ekonomia  Timor-Leste nian.

Austrália sei kontinua apoiu Timor-Leste nia jornada iha adezaun ba ASEAN, no hakarak atu kontinua fornese apoiu ba Governu Timor-Leste hodi lori Timor-Leste iha prosesu ba adezaun no integrasaun  ASEAN nian.

Jornalista: Rogério Pereira Cárceres