Hatutan.com, (25 Juñu 2024), Díli-Bankada Parlamentár CNRT liuhusi Deputada  Cedeliza Faria dos Santos, dezmente deklarasaun polítika Bankada FRETILIN ne’ebé hateten Kandidatu Komisáriu Koimsaun Anti-Korrupsaun  (CAC-siglá portugés), Rui Perreira hanesan kuadru partidu CNRT nian.

Lee Mós: Eleisaun Komisáriu CAC, Rui Pereira Pasa ho Votu Afavór 41, PLP Kontra no FRETILIN Walk Out

Deputada Cedeliza Faria dos Santos. Foto/Elio dos Santos da Costa.

Deputada Cedeliza Faria Dos Santos hato’o parabens bá kandidatu komisáriu  CAC  Rui Perreira ne’ebé mak eleitu ona ho votu kuazé maiória 41 no nia konsidera merese duni hetan votu ida-ne’e.

Kona-bá preokupasaun husi Bankada FRETILIN nian ne’e, Deputada husi Bankada CNRT ne’e rekoñese normal hanesan bankada oposizaun,  Bankada FRETILIN walk out, maibé Bankada  PLP ho Bankada KHUNTO kontribui hodi partisipa ihe eleisaun refere.

“Agora sira mosu fali sira nian komunikadu imprensa ne’ebé mak kestiona komisáriu eleitu CAC Rui Perreira, nia profisionalidade ne’e ha’u hanoin ne’e la’os, ha’u mós estrutura iha partidu CNRT maibé ha’u nunka haree Rui Perreira tama iha estrutura partidu nian. Ne’ebé ha’u rezeita totálmente  hanesan kuadru ida partidu CNRT no hanesan mós deputadu Bankada CNRT  nian ha’u rezeita total imformasaun ne’ebé mak hateten katák Rui Perreira ne’e estrututa partidu CNRT nian, ida-ne’e informasaun laloos,” Deputada CNRT Cedeliza Faria dos Santos bá jornalista sira iha PN, Tersa (25/06/2024).

Membru Bankada CNRT ne’e hateten iha profile Rui Perreira nian ne’e hatudu katák ninia karreira profisionálalidade ne’e iha parte legal ne’ebé merese duni nia atu hetan tuur iha komisáriu CAC nian.

Kestaun seluk  mak komisáriu CAC vakun durante tinan ida ne’ebé presiza ona iha ema ida atu servisu hodi kombate korrupsaun iha Timor Leste.Tanba ne’e, Bankada CNRT ho PD konsegé realiza duni eleisaun komisáriu CAC no inklui hetan apoiu husi PLP no KHUNTO nian maské iha bankada balu vota kontra.

Deputadu António Verdial. Foto/Elio dos Santos da Costa.

Iha fatin hanesan Xefe Bankada KHUNTO, António Verdial hateten haree iha tempu liubá laiha lidér bá CAC hahú husi inisiu kuandu Bankada KHUNTO partisipa to’o horisehik resulta eleisaun ne’e Bankada KHUNTO sempre husu bá Governu atu lalais hili komisáriu CAC ho objetivu atu servisu sira ne’ebé iha CAC ne’e bele la’o hanesan baibain.

Nia haktuir Bankada KHUNTO vota Afavór signifika katák hakarak Governu nia di’ak iha instituisaun di’ak no hakarak iha lidér atu lidara CAC  atu hala’o servisu tuir regra iha Timor-Leste.

“Ita hotu hatene katák hahú horisehik ita iha ona ita nian komisáriu CAC Rui Perreira, ne’ebé ita hotu husu atu nune’e bele hola responsabilidade hodi hala’o nia knaar profisionál no profionaliza institusaun ne’e atu bele la’o ho saudavél pertinente adekuadu firme iha asaun operasionál tomak bá iha prosesu kombate korrupsaun,” Xefe Bankada KHUNTO António Verdial hateten.

Jornalista Estajiária: Zita Menezes