Hatutan.com, (25 Juñu 2024), Díli- Delegasaun Modalidade Futsal Timor-Leste bá ASEAN University Games (AUG) 2024 iha Surabaya & Malang-Indonézia sente estrañu tanba selu vistu ho montante $800.00 mézmu Timor-Leste no Indonézia aplika vistu livre.

Lee Mós: Timor-Leste ho Indonézia Kontinua Hametin Kooperasaun Bilaterál iha Setór Ekonómia

Ekipa Futsal Timor-Leste partisipa iha ASEAN University Games 2024. Foto/Repro

Iha Domingu, 23 fulan-Juñu 2024, hale’u tuku 09.00 dadeer, bainhira delegasaun husi Federasaun Desportu Akadémiku-Timor-Leste (FDA-TL) ne’ebé kompostu husi atleta modalidade Futsal, atleta Xadres , treinadór, ofisiál, hamutuk ema nas’in-25 atu bá partisipa ASEAN University Games 2024.

Sira liuhusi fronteira terrestre Timor-Leste no Indonézia. Bainhira haku’ur tama bá Postu Integradu Fronteira Mota-Ain iha Suku Silawan, Postu Tasifeto Leste, Munisípiu Belu, Timor Osidentál ka NTT (Nusa Tengara Timur), iha atleta sira inklui ofisial sira no estrutura FDA-TL ho dokumentu kompletu no akompaña ho karta ofisial husi Governu Timor-Leaste. Maibé, bainhira to’o iha Postu Integradu Fronteira Monta-Ain, autoridade (Servisu Migrasaun) sira Indonézia nian la autoriza sira atu liu ho razaun tenke iha Vistu Sport (Visa Sport). Ho nune’e, sira ema ida tenke selu $35.00.

Sekretáriu Jerál Federasaun Desportu Akadémiku no Vise Delegasaun Timor-Leste ba AUG, Ricardo da Costa Ribeiro, hateten dezde fulan-Fevereiru 2023, Estadu Indonézia aplika vistu livre bá Timoroan ho pasaporte RDTL tama territóriu nasionál Indonézia, signifika la selu vistu tamba ne’e delegasaun modalidade Futsal la prepara buat ida. Kuandu to’o iha  postu fronteira Mota-Ain, Indonézia iha ema na’in-rua mak uza pasaporte servisu, no na’in-23 mak uza pasaporte komún no too iha pasaporte komún mak Imigrasaun Indonézia husu delegasaun ne’e atu bá ne’ebé, tan ne’e esplika katak atu ba partisipa ASEAN University Games iha Surabaya & Malang, ho nune’e sira dehan lae tenke selu visa Sport (Visa Olahraga).

Nia afirma mézmu nune’e delegasaun tenta esplika ba Imigrasaun Indonézia nian iha Mota-Ain  katak kada tinan tama (entrada) mai laiha buat ida, maibé sira tahan delegasaun hotu no labele hodi hlao delegasaun hein kuaze oras haat ba lima iha de’it postu fronteira Motaain.

“Ami kontaktu ho Ministériu Juventude, Dispostu no Arte Kultura  (MJDAK), liu husi Diretór Jerál no Xefe Departamentu Alta Kompetisaun, no Xefe Gabinete, inklui komunika mós ho Konsul Jerál Timor-Leste iha Kupaun no Atambua para fó apoiu no kontaktu mós ho  Adidu Seguransa Polisia Repúblika Indonézia (POLRI) nian no Imigrasaun Indonézia nian iha Díli, maibé sira dehan labele tenke selu no ami deside selu,” Ricardo da Costa Ribeiro informa hodi responde Hatutan.com via WhatsApp, Tersa (25/06/2024).

Karta ofisiál. Foto/Repro

Nia hatutan delegasaun hotu obrigadu tenke aplika bá vistu sport (visa Sport) iha embaixada Indonézia nian iha Timor-Leste, hodi selu vistu molok tama ba territóriu nasionál Indonézia nian.

“Osan ne’ebé selu vistu ne’e selu ka entrega direita ba pesoál Imigrasaun Indonézia nian iha postu fronteira motaain no hafoin entrega osan, vistu ne’ebé ami simu ne’e la’ós vistu sport maibé visa onoravel bai-bain,” Nia informa.

Nia subliña se delegasaun la selu, labele liu no tiket aviaun nian husi Kupang bá Surabaya inválidu (hangus) hotu no Estadu sei lakon osan saugati de’it, entaun delegasaun deside husu orientasaun hodi selu kada ema ida $35.00 ba ema na’in-23 ho total $800.00

Delegasaun Timor-Leste komunika ona ho komisaun organizadora ASEAN University Games no hato’o ona kestaun ida-ne’e no parte komisaun sei husu atu Governu Indonézia hola responsabilidade ba ida ne’e.

Bainhira Hatutan.com halo konfirmasaun ho parte KBRI Dili, liu husi Adidu Imigrasaun, maibé parte protokolu hateten buat hotu klaru ona (clear) iha Imigrasaun Indonézia nian iha fronteira, maibé ba kestaun ne’e sei husu atu   adidu Imigrasaun KBRI halo klarifikasaun.

Jornalista: Vito Salvadór