Hatutan.com, (25 Juñu 2024), Dili—Ministru Defeza (MD), Donaciano do Rosário da Costa Gomes “Pedro Klamar Fuik” hakarak dezenvolve instituisaun FALINTIL Forsa Defeza Timor-Leste (F-FDTL) sai hanesan forsa armada ida ne’ebé mak ninia orientasaun tenke foku ka haree liu-liu bá asuntu pás nian.

Ministru Defeza (MD), Donaciano do Rosário da Costa Gomes “Pedro Klamar Fuik”.

Ministru Klamar-Fuik hato’o hanoin ida ne’e, hafoin hasoru malu ho Primeiru-Ministru Kay Rala Xanana Gusmão iha Palásiu Governu, Dili, hodi relata atividades balu kona-bá situasaun, dezenvolvimentu forsa nian ne’ebé maka ministériu defeza tutela.

Lee Mós: Falur Husu Pedro Klamar Fuik Prioritiza Dezenvolvimentu no Moris Di’ak Forsa Armada

“Ita hatene katak, iha ita nia rain, ita dezenvolve hanoin pás. Maibé, iha parte hothotu iha mundu ne’e, ita rona maka funu. Ita hakarak mak pás. Entaun, atividades hotuhotu ne’ebé mak ita atu dezenvolve iha ita nia rai ne’e, nia orientasaun para atu kontribui bá konstrusaun pás. Hanesan mós ita hatene, ita nia rai amigus barbarak, buka hanoin atu dezenvolve ezersísius militáres iha ita nia rain. Halo saida, ezersísiu militáres barbarak atu lori ita nia militár sira bá halo funu?, halo funu iha ne’ebé? La’os ida ne’e mak ita nia orientasaun. Entaun, orientasaun maka oinsá maka ita nia forsas armadas atu bele partisipa no kontribui bá prosesu de konstrusaun da pás,” Ministru Defeza hatete iha Palásiu Governu, Dili, tersa (25/06/2024).

La to’o de’it ida ne’e, durante hasoru malu ho xefe governu, Pedro Klamar Fuik mós lori ho hanoin balun, hodi ko’alia bá Primeiru-Ministru kona-bá dezenvolvimentu forsa nian iha área rua hanesan prespetiva atu dezenvolve forsa iha futuru.

Ida maka haree liu bá iha situasaun atuál ne’ebé mak timoroan hotu hatene katak, funu iha fatfatin no iha mós mudansa klimátika no bele provoka buat balun ne’ebé mak la-di’ak bá nasaun sira, rai hothotu.

Ho nune’e, Timor-Leste hanesan rai ida ne’ebé mak ukun-aan, rai ida ne’ebé mak soberanu, iha forsas armadas rasik ne’ebé mak bele orienta bá iha atividades apoiu umanitáriu nian, hanesan iha mudansa klimátika ruma karik, udan, rai-monu, bee-sa’e, bele iha ho partisipasaun forsa armadas nian.

Tanba liuhosi partisipasaun forsa armadas nian bele apoia populasaun bá iha área espesífika ida ne’e, atu bele ajuda estadu, konstrue pás ne’ebé mak timoroan hotu ko’alia, katak, pás ne’ebé maka mundu hakarak no pás ne’ebé maka rai hotu hakarak.

Área ida fali maka iha mudansa klimátikas mós bele provoka moras oioin, no Governu mós haree oinsá maka iha forsas armadas, atu bele dezenvolve áreas espesífika ida kona-bá saúde, hodi bele kontribui mós bá iha sosiedade ida ne’e, en-partikulár bá iha famílias militáres, militár sira nian famílias no populasaun en-jerál.

Jornalista: Rogério Pereira Cárceres