Hatutan.com, (26 Juñu 2024), Dilí—Delegasaun Grupu amizade Parlamentu Thailándia hala’o vizita kortezia mai iha Parlamentu Nasionál (PN) Timor-Leste (TL) nian hodi ko’alia kona-bá investimentu, dezenvolvimentu no servisu koopersaun entre nasaun rua iha futuru.

Delegasaun Grupu amizade Parlamentu Thailándia hala’o vizita kortezia mai iha Parlamentu Nasionál (PN) Timor-Leste (TL) nian hodi ko’alia kona-bá investimentu, dezenvolvimentu no servisu koopersaun entre nasaun rua iha future, kuarta (26/06/2024). Foto: Zita Menezes.

Prezidente Parlamentu Nasionál, Maria Fernanda Lay hateten,  PN simu ekipa ho diak tebes no sira sente hanesan iha sira nia rain rasik tanba ne’e konsege ko’alia kona-bá área sira ne’ebé mak tuir loloos ezekutivu sira nia área.

Lee Mós: Ramos-Horta Kondekora Embaixadór Reinu Tailândia Ho Medalla Ordem de Timor-Leste

“Liga ho investimentu no dezenvolvimentu tanba Parlamentu Nasionál rasik mós presiza iha kooperasaun ho país sira ne’ebé membru ASEAN nian atu ko’alia bá issue saida de’it mak ita presiza apoia hosi Tailándia,” Maria Fernanda Lay hateten hafoin audiénsia ho delegasaun iha PN, kuarta (26/06/2024).

Maria Fernanda Lay hateten, desde Timor-Leste nia indepedénsia Tailándia iha ona kooperasaun iha área hadi’a nutrisaun inan no labarik sira, ko’alia mós kona-bá nutrisaun no asuntu barak ne’ebé liga ho traballu ezekutivu ninian.

Tanba ne’e, Parlamentu Nasionál tenke artikula enkontru ohin ne’e ho Governu nune’e Governu mak sei halo proposta kona-bá oinsá servisu hamutuk iha área saida de’it no Parlamentu presiza prepara an para hodi halo fiskalizasaun bá saida de’it mak bele hala’o koopersaun ho Thailándia.

Jornalista estajiária: Zita Menezes