Hatutan.com, (03 Jullu 2024), Díli-IX Governu Konstitusionál liuhosi sorumutuk Konsellu Ministru, Kuarta (03/07/2024), aprova ona orsamentu ho valór millaun $3.6 bá Ministériu Juventude, Desportu, Arte no Kultura (MJDAK) hodi bele finansia atividade tomak eventu multi-desportiva entre país membru sira Comunidade dos Países de Lingua Portuguêsa (CPLP) nian bá dala-XII, ne’ebé tuir planu sei realiza iha tinan 2025 iha Dili, Timor-Leste.

Lee Mós: XIV Konferénsia CPLP Foka bá Sustentabilidade Juventude

Bandeira CPLP ho bandeira nasionál nasaun sira membru CPLP nian. Foto/Ofisiál CPLP

Aprovasaun bá proposta ida ne’e, hafoin rona aprezentasaun ida hosi Ministru Juventude, Desportu, Arte no Kultura, Nélio Isaac Sarmento, kona-bá preparativu bá Jogus Desportivu CPLP XII, eventu multi-desportivu ida ne’ebé halibur partisipante ho idade menus hosi tinan 16 hosi país CPLP sira, ne’ebé sei hala’o hosi loron 17 to’o loron 27 fulan-Jullu tinan 2025.

“Proposta ida ne’e, Konsellu Ministru aprova orsamentu bá atividade tomak desportu CPLP ninian, ne’ebé envolve xádres, voleiból, basketeból, desportu sira ne’e hotu ne’ebé iha ita-nia rai mós iha, CPLP mós iha, no konsellu Ministrus aprova millaun $3.6 para atu ezekuta projetu desportivu CPLP nian, ne’ebé ita rasik mak sei sai uma-na’in, hanesan patrosinadór,” Ministru Prezidénsia Konsellu Ministrus, Agio Pereira informa bá Jornalista sira liuhosi konferénsia imprensa iha Sala Konferénsia MPCM, Palásiu Governu-Díli.

Durante aprezentasaun ne’e, sira diskute kona-ba infraestrutura ne’ebé iha hela preparasaun, inklui resintu (fatin) oin-oin bá modalidade desportiva ne’ebé diferente, alojamentu, transporte, servisu médiku, seguransa no seluk tan. Aprezenta mós ba membru Konsellu Ministrus logotipu no múzika ne’ebé kria liu-liu bá eventu internasionál ida-ne’e.

Molok ne’e Governu anterior prevee tiha uluk ona orsamentu iha tinan 2020, maibé eventu desportiva ne’e la konsege realiza, tanba pandemia COVID-19, nune’e muda fali bá tinan 2025.

Jornalista: Rogério Pereira Cárceres