Hatutan.com, (03 Jullu 2024), Díli-Governu liuhosi reuniaun Konsellu Ministrus, Kuata  (03/07/2024), iha Palásiu Governu, aprova projetu Rezolusaun Parlamentu Nasionál, ne’ebé aprezenta hosi Vise-Ministra bá Asuntu ASEAN (the Association of Southeast Asian Nation), Milena Maria da Costa Rangel, hodi ratifika akordu kona-bá izensaun vistu entre Repúblika Demokrátika Timor-Leste ho Singapura, Tailándia no Brunei Darussalam.

Lee Mós: Singapura Tau Importánsia Kooperasaun Ekonomia, Komersiál no Investimentu ho Timor-Leste

Reuniaun Konsellu Ministru.Foto/Dok

Iha akordu Izensaun Vistu ne’e TL ho Governu Repúblika Singapura bá Titulár Pasaporte Diplomátiku, Ofisiál ka Servisu no Ordináriu nian, Reinu Tailándia bá Objetivu Turístiku bá Titulár Pasaporte Komún, no Governu hosi Sua Majestade Sultaun no Yang Dipertuan hosi Brunei Darussalam bá Titulár Pasaporte Diplomátiku no Ofisiál ka Servisu nian.

“Konsellu Ministrus ordináriu ne’ebé aprova proposta rezolusaun, tanba tenke hatuun bá Parlamentu Nasional atu atu ratifika protokolu ne’ebé ita atu hetan akordu bá Izensaun de Vistus bá rai seluk, ida maka RDTL ho Singapura, ida mak RDTL ho Tailandia, ida maka RDTL ho Brunei Darussalam, ne’e duni maka Konsellu Ministru aprova hotu, depois sei hatuun bá Parlamentu Nasional husu apoiu ka endosa, hodi fó izensaun de vistus bá ita nia passaportes tituláres, passaporte diplomátiku, passaportes komun, passaporte de traballu ou ita bolu passaportes servisu,” Ministru Prezidénsia Konsellu Ministrus, Agio Pereira informa bá Jornalista sira liuhosi konferénsia imprénsa iha Sala Konferénsia MPCM, Palásiu Governu-Díli.

Vise-Ministra bá Asuntus ASEAN, Milena Maria da Costa Rangel, halo mós aprezentasaun ida bá Konsellu Ministrus kona-bá Relatóriu tinan 2024 nian relasiona ho progresu iha implementasaun Roteiru bá Adezaun Timor-Leste hanesan Membru Plenu ASEAN nian.

Durante aprezentasaun, ko’alia-liu kona-bá esforsu sira ne’ebé hala’o ona hodi kumpre rekizitu no objetivu atu adere bá ASEAN, inklui partisipasaun ativa Timor-Leste iha sorumutu oioin órgaun setoriál sira ASEAN nian hanesan observadór.

Vise-Ministra halo pontu situasaun ida kona-bá progresu ne’ebé alkansa ona iha prosesu negosiasaun ne’ebé la’o hela no sira ne’ebé konklui ona, kona-ba akordu oioin no instrumentu vinkulativu seluk ne’ebé presiza.

Milena Rangel mós fornese informasaun detallada kona-bá asaun kapasitasaun sira ne’ebé realiza ona to’o ohin loron, no subliña propriedade no atividade prinsipál sira ne’ebé sei implementa iha futuru hodi garante preparasaun kontínua no aliñamentu Timor-Leste nian ho rekizitus ASEAN.

Doasaun Rihun $200 bá Sekretariadu ASEAN

Iha sorumutu Konsellu Ministrus mós aprova projetu Rezolusaun Governu, ne’ebé aprezenta mós hosi Vise-Ministra bá Asuntus ASEAN, Milena Maria da Costa Rangel, ne’ebé aprova Kontribuisaun ida ho valor rihun $200 ba Sekretariadu Tékniku ASEAN.

“Hetan mós pedidu hosi MNEK hodi RDTL atu fó doasaun, kontribuisaun voluntáriu bá ASEAN nia sekretariádu tékniku ne’ebé konsellu ministrus aprova 200 mill dollares, hodi kontribui bá fasilita servisu sekretariadu tékniku ASEAN ninian,” Agio Pereira informa.

Tuir mai Ministru Prezidénsia Konsellu Ministrus, Agio Pereira no Ministru Administrasaun Estatál, Tomás do Rosário Cabral, halo aprezentasaun ida kona-bá Sistema Rezíduu Sólidu Urbanu iha Dili.

Durante aprezentasaun ne’e, halo enkuadramentu ida ba projetu no analiza kontratu oioin bá ninia implementasaun. Membrus Konsellu Ministrus diskute mós solusaun legál sira ne’ebé iha posibilidade atu ultrapasa problemas ne’ebé verifika ona iha ezekusaun kontratu bá projetu ida-ne’e.

 Jornalista: Rogério Pereira Cárceres