Hatutan.com, (03 Jullu 2024), Díli-Projetu Set-Top Box Rádiu Televizaun Timor-Leste, Empreza Públiku (RTTL,E,E.P)  falla total tanba la kontinua ona.

Lee Mós: Kazu Projetu Set-top Box RTTL,E.P iha Prosesu Distribuisaun Ba Prokuradór Titulár

Aparellu sira atu suporta intalasaun Set-Top Box RTTL,E.P sobu hotu ona. Foto/Hatutan.com

Survey Tatoli 2023 husi ABC International Development (ABCID) kona-bá Situasaun Média: Timor-Leste  2024 iha parte Infraestrutura Mídia nian, sita mós katak projetu pilotu ida kona-bá estabelesimentu sistema televizaun dijitál instala tiha ona iha RTTL iha 2019 no suporta husi Xina ne’ebé lansa iha 2021, maibé to’o inísiu 2024 projetu ida-ne’e kontinua la la’o tanba problema tékniku.

Iha loron hirak liu tékniku sira iha RTTL,E.P mós sobu hotu ona aparellu sira ne’ebé instala iha arredores  estúdiu sentrál RTTL,E.P atu fó susporta bá projetu  Set-to Box RTTL,E.P ne’ebé hetan apoiu husi Xina.

Informasaun ne’ebé Hatutan.com  rekolla husi fontes sira iha RTTL,E.P katak aparellu sira ne’ebé fó supoerta bá instalasaun projetu Set-Top box RTTL,E.P sobu tanba laiha ona kontinuasaun no aparellu sira-ne’e sei   muda bá asegura  ne’ebé seidauk determinadu.

Kona-bá situasaun ne’e Tersa (02/07/2024), Hatutan.com halo ona esforsu hodi buka entrevista ho Prezidente Konsellu Administrativu RTTL, E.P, José António Belo iha kna’ar fatin Caicoli, maibé rejeita fó ninia komentáriu.

Iha sorin seluk, Sekretária Estadu Komunikasaun Sosial (SEKOMS), Expedito Dias Ximenes esklarese katak, aparellu sira bá projetu dijitalizasaun RTTL,E.P nian ne’e la’ós sobu, maibé muda de’it, tanba tuir planu atu harii no haluan fali tán edifísiu foun RTTL,E.P nian hamutuk estrela (andar) haat, ne’ebé sei hetan tulun finanseira husi Governu Japaun liuhosi nia embaixada Japaun nian iha Dili-Timor-Leste.

“Ne’e muda ne’e atu halo edifísiu foun. La’ós sobu, sira muda. Sira muda tanba ida edifísiu foun agora atu halo ne’e, nia prosesu la’o hela atu halo tenderizasaun, ne’ebé, agora, RTTL halo hela mudansa bá uma rua ne’e, ne’ebé sira muda tiha ne’e para tau fali fatin seluk para depois sira sobu uma ne’e para osan apoiu hosi Japaun ne’e atu halo edifísiu foun bá RTTL andar haat. Edifísiu foun ne’e sei harii fali iha ne’ebá, harii duni iha fatin ne’ebé uluk instala aparellu sira ne’e,” SEKOMS Expedito Dias Ximenes hatete bá Hatutan.com iha Palásiu Governu, Kuarta (03/07/2024). 

SEKOMS Expedito informa, estúdiu ida iha edifísiu tuan ne’e tekniku sira sobu tiha ona, no sasán balu muda tiha ona bá tau tiha fali iha edfiísiu foun ne’ebé foin lalais inaugura, maibe balu sira transporta bá tau iha armájen ida iha Fatuahi nian leten.

Aparellu sira ne’ebé atu suporta instalasaun Set-top Box RTTL,E.P sobu hotu ona, Segunda (01/07/2024). Foto/Hatutan.com

Hafoin ida ne’e, sei sobu tán edifísiu ida tuan ne’e, atu nune’e iha fulan-Agostu mai oin, sira komesa halo ona tenderizasaun, hodi nune’e iha fulan-Setembru bele hahú ona edifísiu foun RTTL nian.

“Aparellu sira dijitalizasaun nian ne’e la sobu ida, ne’e sira hasai de’it para muda fali bá tau fatin seluk. Ida dijitalizasaun iha kotuk, ne’e projetu pilótu ida Governu uluk nian ida Set Top Box  bolu dehan DTNB,” Expedito Dias hateten.

Hatán kona-bá projetu Set-top Box RTTL, E.P ne’e sei kontinua ka lae, SEKOMS Expedito Dias Ximenes hateten  ida-ne’e depende bá ezekutivu RTTL, E.P ho Governu Xina, sira mak sei halo diskusaun kona-bá projetu ne’e no atu kontinua ka lae, ne’e depende bá sira.

“RTTL halo hela komunikasaun ho Governu Xina, para sira muda tiha, atu kontinua oinsá, depois sira sei diskute fali, atu loke foun fali ka, atu kontinua, ka, oinsá. Mais agora provizóriu sei muda, tanba RTTL nia fatin ne’ebá ne’ebá mós halo edifísiu boot, andar,” Expedito hateten.

Enkuantu kona-bá dijitalizasaun bá RTTL, E.P, SEKOMS Expedito Dias hatete katak, prosesu la’o dadauk hela, maibé sira dijitaliza tiha ona RTTL, E.P, muda hosi média analoga bá tiha ona dijitál.

Fó lambra fali katak projetu Set-top Box RTTL,E.P ne’e iha tinan 2023, Komisaun Anti Korrupsaun (CAC) konstitui tiha ona Ministru Asuntu Parlamentár no Komunikasaun Sosiál (MAPKOMS) tempu ne’ebá, Francisco Martins da Costa Pereira Jerónimo ho mós parte balun. tan hanesan arguido.

CAC konstitui Ministru Francisco  Martins da Costa Pereira Jerónimo  nu’udár arguido tuir baze legal ka Kódigu Prosesu Penal (KPP) artigu Artigu 91 (Notifikasaun), alínea 3  ne’ebé hateten, funsionáriu judisiál, ajente polisiál  ka autoridade seluk ne’ebé lei fó kompeténsia maka halo notifikasaun tuir despaxu ka ho oden ofisioza hosi sekretaria judisiál.

Kazu projetu instalasaun Set-top Box RTTL,E.P ne’e konsidera lori prejuízu bá Estadu ho montante orsamentu $7,680.00.

Iha loron 17 fulan-Outubru 2022, Comissão Anti Corrupção (CAC), liuhosi ekipa Medida Prevensaun no Kombate Korrupsaun, halo  buska no apreensaun bá dokumentu iha gabinete Ministru Assuntu Parlamentár no Komunikasaun Sosiál (MAPKOMS), Francisco Pereira da Costa Jerónimo, hodi hakle’an investigasaun ba kazu instalasaun Set-top Box RTTL,E.P.

Iha loron 16 fulan-Outubru 2022, Tribunál Distritál Díli (TDD) liu hosi despaixu ikus, aplika medida aprezentasaun periódika no medida proibisaun auzénsia bá arguidu GDS no arguida MCS ne’ebé envolve mós iha kazu projetu  instalasaun Set-top Box RTTL,E.P .

Arguido ho inisiál GDS  ne’e hanesan asesór prinsipál ida iha gabinete MAPKOMS no arguida MCS nu’udár sósiu  bá Empreza Díli Eternal Innovation Information, Lda hanesan mós sekretaria bá iha gabinete Prezidente Federasaun Futeból Timor-Leste (FFTL), Francisco Jerónimo tempu ne’ebá. Prosesu kazu Set-top Box RTTL,E.P ne’e kontinua paradu iha Tribunál dezde tinan kotuk to’o inísiu 2024 ne’e.

Lee Mós: CAC Submete Kazu Korrupsaun 16 bá MP Inklui Kazu eis-Ministru MAPKOMS

Jornalista: Rogério Pereira Cárceres