Hatutan.com, (11 Jullu 2024), Dili—Ajénsia Nasoins Unidas nian Fundu Emerjénsia Internasionál bá Labarik sira ka the United Nations International Children’s Emergency Fund (UNICEF) komprometidu atu tulun nafatin Governu Timor-Leste (TL) hodi hadi’a nutrisaun labarik nian.

Primeiru-Ministru, Kay Rala Xanana Gusmão enkontru ho Country Reprezentativu, Patrizia Digiovanni no delegasaun UNICEF, iha Palásiu Governu, Dili, kinta (11/07/2024).

Kompromisu ne’e hato’o direta hosi reprezentante foun UNICEF nian mai Timor-Leste, Patrizia DiGionavnni, durante hasoru-malu ho Primeiru-Ministru Kay Rala Xanana Gusmão, iha Palásiu Governu, kinta (11/072024).

Lee Mós: ChildFund ho Ministériu Justisa no UNICEF Ensera Projetu Rejistu Móvel Iha RAEOA

“Ohin ami diskute kona-bá situasaun labarik sira iha rai-laran. Saida mak prioridade Governu nian no saida mak UNICEF bele halo hodi asiste kona-bá labarik sira nia moris sai di’ak liu tán iha nasaun ida ne’e,” Patrizia DiGionavnni hateten hafoin enkontru.

Reprezentante foun UNICEF ne’e esplika, sira-nia prioridade loloos maka dezenvolvimentu Infánsia inklui nutrisaun, saúde labarik sira nian no ida-ne’e inklui faze dezenvolvimentu inisiál infánsia nian.

“Ami haree hela sira nia saúde hosi inan sira ne’ebé isin-rua no neonatal. Entaun oan primeiru sira ne’ebé sei ki’ik tebes no buat balun seluk ne’ebé ha’u provavelmente haluha ona, maibé ita koko no haree bá infánsia nia luan tomak. Haree oinsá ita bele, bá servisu sira ne’e hotu hamutuk hodi hadi’a labarik sira nia moris,” nia afirma.

UNICEF nia misaun iha TL dezde 1994, tanba ne’e nia sente orgullu tebes hodi mai halo parte iha tradisaun ida iha ne’ebé sira ajuda labarik sira, tuir área prioridade sira ne’ebé mak diskute ona antes, sai nu’udár sira-nian kompromísiu bá futuru.

Ida maka haree kona-bá oinsá UNICEF bele ajuda servisu sosiál sira atu sai amigável liután bá klima no mós haree bá joven sira nian kontribuisaun furak ne’ebé maka sira tenke halo.

Seluk fali maka, kona-bá progresu sira iha área servisu ho seitór saúde haree bá saúde jerál labarik nian, imunizasaun ne’ebé importante tebes bá labarik no joven sira. Feto isin-rua sira nia saúde, atu nune’e sira nia oan mós bele moris ka saudável. Kualidade bee iha komunidade, saneamentu no saúde, no bá área sira edukasaun nian hotu.

UNICEF nu’udár ajénsia ida hosi Nasoins Unidas ne’ebé responsábiliza fornesimentu apoiu umanitária no dezenvolvimentu bá labarik sira iha mundu tomak hahú kedan iha tinan 1953 to’o ohin loron.

UNICEF mak organizasaun entidade bem-estar sosiál ida ne’ebé koñesidu no vizível liu iha mundu tomak, ne’ebé hala’o operasaun iha nasaun no teritóriu 192.

UNICEF nia atividade sira inklui fornese imunizasaun no prevensaun moras, administra tratamentu bá labarik no inan sira ho HIV, hasa’e nutrisaun infánsia no inan nian, hadi’a saneamentu, promove edukasaun, no fornese tulun emerjénsia hodi hatán bá dezastre sira.

Jornalista: Rogério Pereira Cárceres