Hatutan.com, (13 Jullu 2024), Díli- Ministru Negósiu Estranjeiru no Kooperasaun (MNEK), Bendito dos Santos Freitas, Sesta (12/07/2024), hala’o enkontru kortezia ida ho Sekretáriu Ezekutivu Comunidos dos Países da Língua Portuguesa (CPLP), Zacarias Albano da Costa, hodi ko’alia kona-bá preparasaun ba enkontru anuál Konsellu Ministru CPLP ne’ebé sei hala’o iha loron 19 fulan-Jullu, tinan ne’e, iha São Tomé e Principe.

Lee Mós: Estadu Membru CPLP Apresia Partisipasaun Timor-Leste iha Sentru Análize Estratéjika

MNEK Bendito dos Santos Freitas hala’o enkontru kortezia ida ho Sekretáriu Ezekutivu CPLP, Zacarias Albano da Costa, Sesta (12/07/2024). Foto/Mídia MNEK

Komunikadu bá Imprensa ne’ebé Hatutan.com asesu husi Gabinete MNEK, Sábadu (13/07/2024), Ministru Bendito dos Santos Freitas, hateten enkontru anuál Konsellu Ministru CPLP ne’e importante tebes, atu bele kumpre bá planu asaun sira-ne’ebé konkorda tiha liu husi simeira Xefe Estadu no Xefe Governu CPLP ne’ebé hala’o iha fulan-Jullu 2023 iha São Tomé e Príncipe.

“Iha oportunidade ida-ne’e hasoru malu ho Sekretáriu Ezekutivu CPLP, Zacarias Albano da Costa, diskute uitoan opiniaun, planu asaun ne’ebé mak sei akontese iha reuniaun Konsellu Ministru iha São Tomé e Principe. Enkontru anuál ne’e importante tebetebes atu bele kumpre planu asaun ne’ebé konkorda tiha ona, akordu ne’ebé hala’o iha tinan kotuk, nune’e bele fó segmentu ba asaun sira-ne’e,” Ministru Bendito dos Santos Freitas hateten.

Planu asaun sira-ne’ebé aprovadu iha simeira Xefe Estadu no Xefe Governu CPLP nian mak foka liubá programa dezenvolvimentu juventude no sustentabilidade, inklui mós programa kooperasaun iha área kapasitasaun rekursu umanus, mobilidade pesoál, edukasaun inklui juventude no desportu no seluk tan.

Sekretáriu Ezekutivu CPLP, Zacarias Albano da Costa reforsa, sorumutuk ne’e, ko’alia mós kona-bá situasaun iha CPLP no Timor-Leste, liu-liu atividade ne’ebé mak la’o hela iha São Tomé e Principe hanesan prezidénsia CPLP no mós dezafiu boot ne’ebé komunidade CPLP sei hasoru iha futuru.

“Reuniaun ida importante ne’ebé akontese tinan-tinan, asuntu barak mak ami sei ko’alia kona-bá atividade ne’ebé hala’o hela durante prezidénsia São Tomé e Principe, no mós dezafiu boot ne’ebé CPLP sei hetan nu’udar komunidade,” Zacarias Albano da Costa hateten.

Nia hatutan, reuniaun Konsellu Ministru CPLP ne’e mós sei deside kalendáriu ba reuniaun CPLP iha 2025 no mós entrega prezidénsia rotativa CPLP ba nasaun ne’ebé atu lidera iha tinan oin.

“Naturalmente asuntu ida mós boot diskusaun kona-ba prósima prezidénsia CPLP, iha tiha ona desizaun para Guinea Bissau sei simu prezidénsia iha tinan oin, mais ita hotu hatene situasaun iha ne’ebá no Ministru sira sei deside kona-ba ida-ne’e mós,” tenik nia.

Sorumutuk ne’e akompaña husi Reprezentante Misaun Permanente Timor-Leste nian bá CPLP, Embaixadora Laura Abrante, Embaixadora Timor-Leste ba Portugal, Isabel Guterres no seluk tan.

Jornalista: Vito Salvadór