Hatutan.com, (16 Jullu 2024), MANATUTO—Governu liu-hosi Ministériu Petróleu no Rekursus Minerais (MPRM) planeia ona atu transforma suku Betano sai sidade administrativu ida bá petróleu no minerais nian.

Ministru Petróleu no Rekursus Minerais (MPRM), Francisco da Costa Monteiro ho delegasaun espesiál Governu Austrália halo vizita no observa direta bá fatin estabelesimentu planta LNG, refinária ho petrokímikas iha área tasi-ibun, aldeia Fehukrin, suku Uma-Boco, postu administrativu Barique-Natarbora, Manatuto, tersa (16/07/2024). Foto: Rogério Pereira Cárceres.

Ministru Petróleu no Rekursus Minerais (MPRM), Francisco da Costa Monteiro hato’o asuntu ne’e durante ho delegasaun espesiál Governu Austrália halo vizita no observa direta bá fatin estabelesimentu planta LNG, refinária ho petrokímikas iha área tasi-ibun, aldeia Fehukrin, suku Uma-Boco, postu administrativu Barique-Natarbora, Manatuto, tersa (16/07/2024).

Lee Mós: Timor Resource Investe Millaun $70 iha Perfurasaun Mina iha Suai ho Betano

Francisco da Costa Monteiro haktuir, iha tinan barak liu bá ema hotu mós hein kona-bá planu Governu nian ne’ebé atu harii fatin bá refinária ho petrokímikas nian iha suku Betano, postu administrativu Same Vila, Munisipiu Manufahi, maibé refinária ho petrokímikas ne’e governu deside hodi muda hotu bá iha Natarbota, inklui mós planta LNG ho Pipeline nian ne’ebé uluk governu atu halo iha Beaço-Vikeke, muda bá hamutuk iha Natarbora atu bele iha sinérjia téknikas no komersiál.

“Entaun, Betano ne’e ita dezigna ona atu halo polu dezenvolvimentu atu sai hanesan sidade administrativu bá petróleu no minerais,” Ministru Francisco da Costa Monteiro hateten.

Delegasaun sira Australia nian ne’e mai halo observasaun tanba hetan konvite hosi Primeiru-Ministru RDTL, Kay Rala Xanana Gusmão, ne’ebé husu atu halo vizita direta bá projetu hirak ne’ebé la’o daudaun iha área Kosta Súl nian.

Tuir planu, iha fulan neen mai oin Timor Gap ho IGTL sei tun bá Betano hodi halo observasaun, atu hahú prosesu identifikasaun kona-bá terras no propriedade, prosesu libertasaun rai bá auto-estrada.

Hatán kona-bá projetu konstrusaun auto-estrada ne’ebé oras ne’e foin to’o de’it iha Postu Administrativu Zumalai, governante e’e dehan, prosesu kontinuasaun bá auto-estrada rasik la’o hela no iha hela tenderizasaun.

Ministru Petróleu no Rekursus Minerais (MPRM), Francisco da Costa Monteiro ho delegasaun espesiál Governu Austrália halo vizita no observa direta bá fatin estabelesimentu planta LNG, refinária ho petrokímikas iha área tasi-ibun, aldeia Fehukrin, suku Uma-Boco, postu administrativu Barique-Natarbora, Manatuto, tersa (16/07/2024). Foto: Rogério Pereira Cárceres.

Iha okaziaun ne’e, Hon Steve Bracks dehan, hanesan reprezentante espesial Governu Australia nian, ninia servisu maka atu kontribui haree oinsá asuntu greater sunrise nian, negosiasaun prosesu ida la’o daudaun ne’e bele akontese lalais.

“Ha’u servisu hamutuk ho ministru petróleu no minerais ne’ebé halo servisu di’ak tebes, haree bá populasaun sira iha ne’e, populasaun barak ne’ebé aban-bainrua sei hola parte iha servisu ne’ebé mak karik sei akontese,” nia hateten.

Prezidente Autóridade Munisipiu Manufahi, Luis Marcal da Costa Tavares hato’o boas-vindas bá delegasaun espesial Governu Australia nian, no lori populasaun Manufahi tomak nia naran, agradese bá vizitida ne’e.

Nia fiar katak, ho vizita ida ne’e hodi hadi’ak liután relasaun entre Timor ho Australia, espesialmente Manufahi.

Jornalista: Rogério Pereira Cárceres