Hatutan.com, (21 Jullu 2024), Díli—Karreta Estadu ho númeru matrikula  03.430G, Domingu (21/07/2024), hale’u tuku 2:00 madrugada, hetan asidente  ka dezastre iha área Kakaulidun, Suku Bairru Píte, Postu Admistrativu Dom Aleixo, Munisípiu Díli.

Lee Mós: Uza Veíkulu Estadu La’ós iha Oras Servisu Tenke Hetan Autorizasaun Husi Superiór

Kerreta Estadu hetan dezastre iha Domingu (21/07/2024), hale;u tuku 02:00 madrigada. Foto/Leopoldina de Carvalho

Asidente ne’e tuir nia kronolojia, motorista ne’ebé utiliza karreta Estadu ne’e halai ho velosidade no deskonfia ho kondisaun lanu, no tanba halai ho velosidade halo karreta tatidik maka’as, haksoit sai husi Estada bá atu soke tan komunidade ida nia uma hodi rezulta karreta ne’e nia kondisaun oin rahun.

Komunidade sira ne’ebé hela besik liu-liu uma na’in ne’ebé karreta refere atu soke hakfodak no halai sai mai haree karreta ne’e ho ema hirak iha karreta laran.

Iha karreta laran, hetan mós serveja marka ABC dos rohan, ne’ebé deskonfia nia rohan ne’e parte sira hemu-hotu ona, tanba ne’e funsionáriu ida ne’ebé kondús karreta ne’e ko’alia iis sai mai hanesan ema foin konsumu hela tua alkóliku ka serveja.    

Husi informasaun ne’ebé Hatutan.com halibur iha lokál akontesimentu, katak iha ema na’in-tolu mak iha karreta laran, ne’ebé deskonfia motorista ne’e funsionáriu públiku ida Autoridade Aduaneira ka (Customs Officer) IPB Salele ho inisiál MA ne’ebé tula mós inan-feton ida, deskonfia nia espoza no alin-mane  ida ho minoridade, ne’ebé deskonfia funsionáriu ka motorista ne’e nia oan-mane.

Serveja ho marka ABC iha karreta nia laran. Foto/Leopoldina de Carvalho

Hatutan.com tenta halo konfirmasaun ho motorista ne’e, maibé nia rejeita no fila diskute malu fali ho jornalista.  Maske nune’e, nia autoriza Hatutan.com bele  foti imajen karreta Estadu nian ho marka Hilux nian ne’ebé nia lolon hakerek “KARETA ESTADO”, maibé nia rejeita halo entrevista tanba razaun  nia utiliza hodi halo servisu Governu nian.

Rona tiha ida-ne’e, Hatutna.com buka konfirma ho karta autorizasaun ka guia de marsha husi nia autoridade, maibé motorista ne’e ho kondisaun hirus hodi lia-tun de’it dehan, “Sim! karreta Estadu, maibé ami halo ami nia servisu, Governu nian ita-boot la persija hatene, ha’u lakohi atu esplika, hakarak foto, foto deit.”

“Nanti, (ursida) ema haree plat ka númeru matrikula ne’e ema sei koñese ha’u. Yang penting/importante karreta Estadu plat/númeru matrikula  03.430G, “ motorista ne’e hateten.

Nia lia-tun bá Hatutan.com dehan, Vise-Primeiru-Ministru, Ministru Koordenadór bá Asuntu Sosiál, Ministru Dezenvolvimentu Rurál no Abitasaun Komunitaria, Mariano Assanami Sabinno ho Primeiru-Ministru (PM), Kay Rala Xanana Gusmão hatene  sé mak nia.

“Assanami hatene, Xanana hatene, ha’u la presiza ita-boot hatene, ema atu bolu ha’u, atu Primeiru-Ministru bolu ha’u mak ha’u ba koalia, lalika investiga ha’u,” motorista ne’e tenik tan hodi dehan jornalista bele foto de’it  no jornalista tenke fó informasaun klaru.  

Karreta Estadu hetan dezastre iha área Kakaulindun, Bairru Pité, Díli, Domingu (21/07/2024), hale’u tuku 02:00 madrugada. Foto/Leopoldina de Carvalho

“Sim! Loos, ne’e  karreta Estadu, maibe ha’u  servisu bá Estadu mak Estadu fó karreta mai ha’u. Ha’u la’ós vadiu, ha’u la’ós kondutór bá karreta Governu nian.”

Nia dehan tan katak nia parte  informa ona bá Komisaun Anti-Korrupsaun (CAC, sigla portugés) no informa mós bá parte relevante  sira. Katak karreta ne’ebé nia konduz hetan  dezastre.

Abitante sira ne’ebé sai hosi sira-nia uma bá haree asidente ne’e hateten karreta ne’e iha ema na’in-tolu mak iha laran, kompostu husi motorista, inan-feto ida ho alin-mane ida ho menoridade.

“Ha’u hadeer mai, bá haree nia lanu todan. Nia (motorista-red) dehan bá ha’u dehan nia forsa, ne’e mak hau dehan forsa bá, ne’ebé ó mai soke tun-sae seit ema nia uma ka, nune’e nia husu tiha deskulpa,” abitante ne’e haktuir.

Informasaun ne’ebé abitante sira iha fatin ne’ebá dada-lia ho inan-feton ne’ebé sa’e mos karreta ne’e ne’ebé deskonfia funsionáriu ne’ebé kondús karreta Estadu ne’e haktuir sira-mai husi foho tula mós tula kolega funsionáriu ida fila, depois hatuun nia kolega, sira atu fila bá uma iha Manleu mak akontese dezastre ne’e.

 Jornalista : Leopdina de Carvalho