Hatutan.com (23 Jullu 2024), Díli- Governu iha  seriedade  harii sentru juveníl hodi akumula no eduka labarik “kriminozu” sira ne’ebé komete krime iha sosiedade.

Lee Mós: Governu Sei Harii Sentru Prizionál Ida iha Wedauberek no Prizaun bá Juvenil iha Tibar

Ilustasaun iha Prizaun Laran. Foto/Google

“Ha’u hanoin prosesu sira ne’e la’o hela no ita boot sira hatene katak ita nia joven sira ne’ebé iha problema justisa ka tanba sira nia inkapasidade ka imputabilidade responsablidade sira tanba sira iha minóridade konserteza sira sujeita ba iha aktu ruma no presiza eduka sira tanba ita boot sira hatene muito bem katak dala ruma auzénsia koñesimentu no inkapasidade sira nian entaun sira sujeita iha aktu kriminál ruma ka iha hahalok ruma ne’ebé kontra bandu ita presiza eduka sira, no presiza iha fatin ida própriu oinsá atu orienta sira nune’e sira bele sai ema ne’ebé di’ak,” Ministru Sérgio de Jesus Fernandes da Costa Hornai ba jornalista sira iha Palásiu Prezidensiál, Tersa (23/07/2024).

Governante ne’e hatutan tanba labarik sira mak Timor-Leste nia jerasaun bá futuru, no sira-nia komportamentu sira diariamente tenke orienta ba hahalok sira ne’ebé pozitivu ba iha sosiedade, família no mós país ida, tanba ne’e Governu iha planu no hanoin di’ak atu kria sentru juveníl hodi eduka no orienta sira ba dalan los.

Nia afirma liután, atu halo konstrusaun sentru juveníl iha tiha ona fatin, provizoriumente fatin ida iha Tibar sai hanesan preferénsia atu  bele haree no iha mós planu seluk mak sentru sira seluk prizaun para atu halo re-insersasaun sosiál hanesan Weberek.

Jornalista: Vito Salvadór